बार्टी, सारथी जोमात, महाज्योती कोमात; पात्र उमेदवार शिष्यवृत्तीच्या प्रतीक्षेत
राज्य शासनाने यापूर्वी प्रसिद्ध केलेल्या शासननिर्णयात 'महाज्योती'कडे नोंदणी केलेल्या सर्व पात्र विद्यार्थ्यांना शंभर टक्के फेलोशिप देण्याबाबत उल्लेख आहे, मात्र, त्यात पात्र विद्यार्थ्यांची संख्या नमूद नाही. त्यामुळे किती विद्यार्थ्यांना फेलोशिप मिळणार, याबाबत विद्यार्थ्यांमध्ये गोंधळाची स्थिती निर्माण झाली आहे.
eduvarta@gmail.com 
एज्युवार्ता न्यूज नेटवर्क
'बार्टी' पाठोपाठ 'सारथी' संस्थेकडे फेलोशिपसाठी (Barti, Sarathi, Mahajyoti Fellowship)नोंदणी केलेल्या संशोधक विद्यार्थ्यांना सरसकट पूर्ण अधिछात्रवृत्ती देण्याबाबत शासन निर्णय प्रसिद्ध (Government decision published) झाले आहेत. मात्र, 'महाज्योती' संस्थेकडे नोंदणी केलेल्या पात्र विद्यार्थ्यांची संख्या आणि फेलोशिपची रक्कम याबाबत शासनाकडून स्पष्टीकरण देण्यात आले नाही. त्यामुळे बार्टी, सारथी जोमात असून महाज्योती मात्र कोमात असल्याचे चित्र दिसून येत आहे. यासंदर्भात शासन निर्णय केव्हा प्रसिद्ध होतो, याची 'महाज्योती'चे विद्यार्थी प्रतीक्षा (Students of Mahajyoti are waiting) करीत आहेत.
राज्य शासनाने यापूर्वी प्रसिद्ध केलेल्या शासननिर्णयात 'महाज्योती'कडे नोंदणी केलेल्या सर्व पात्र विद्यार्थ्यांना शंभर टक्के फेलोशिप देण्याबाबत उल्लेख आहे, मात्र, त्यात पात्र विद्यार्थ्यांची संख्या नमूद नाही. त्यामुळे किती विद्यार्थ्यांना फेलोशिप मिळणार, याबाबत विद्यार्थ्यांमध्ये गोंधळाची स्थिती निर्माण झाली आहे. राज्य शासनाने संशोधक विद्यार्थ्यांसाठी समान धोरण राबविणार असल्याचे स्पष्ट केले आहे. असे असताना तिन्ही संस्थेसाठी वेगवेगळे शासन निर्णय प्रसिद्ध का केले जात आहेत? असा सवालही संशोधक विद्यार्थ्यांकडून उपस्थित केला जात आहे.
शासनाने तत्काळ शासन निर्णय प्रसिद्ध करीत दिलासा द्यावा, अशी मागणी 'महाज्योती'कडे नोंदणी केलेल्या संशोधक विद्यार्थी करीत आहेत. तसेच महाज्योती कडे १ हजार ४५३ विद्यार्थ्यांनी फेलोशिपसाठी अर्ज केले होते. त्यापैकी ८७० विद्यार्थ्यांची कागदपत्रे पडताळणी पूर्ण झालेल्या उमेदवारांची प्रारूप यादी तयार आहे. तसेच संस्थेने आज ७ ऑक्टोबरपर्यंत कागदपत्रे पडताळणीची अंतिम मुदत दिली आहे.
