ऐतिहासिक निर्णय! शासकीय वसतिगृहांच्या नावातील 'मागासवर्गीय' शब्द वगळून, महापुरुषांची नावे दिली जाणार

 एज्युवार्ता न्यूज नेटवर्क

महाराष्ट्र सरकारच्या सामाजिक न्याय व विशेष सहाय्य विभागाने (Department of Social Justice and Special Assistance) एक महत्वपूर्ण आणि ऐतिहासिक निर्णय घेतला आहे. विभागांतर्गत चालवल्या जाणाऱ्या मागासवर्गीय मुला-मुलीच्या शासकीय वसतिगृहांच्या नावातील 'मागासवर्गीय' हा शब्द आता वगळण्यात (The word 'backward class' was omitted) आला आहे. आता या वसतिगृहे महापुरुषांचे नावे दिली जाणार आहेत. सामाजिक विषमता दूर करणे आणि विद्यार्थ्यांमध्ये महापुरुषांचा स्वाभिमान जागृत करणे, हा या निर्णयामागचा मुख्य उद्देश असून याबाबतचा शासन निर्णय नुकताच प्रसिद्ध (Government decision published) करण्यात आला आहे.

सध्या अनेक वसतिगृहाच्या नावांमध्ये 'मागासवर्गीय' या शब्दाचा वापर केला जात होता. प्रशासनाच्या मते, हा शब्द समाजातील उपेक्षित आणि शोषित घटकांकडे निर्देश करतो, ज्यामुळे नकळतपणे विषमता अधोरेखित होते. अशा नामकरणामुळे संस्थेची ओळख एका विशिष्ट घटकापुरती मर्यादित राहते आणि विद्यार्थ्यांकडे पाहण्याचा समाजाचा दृष्टिकोनही प्रभावित होतो ही नकारात्मकता दूर करण्यासाठी आणि सर्वसमावेशकत्ता जपण्यासाठी 'मागासवर्गीय' हा शब्द काढून त्याऐवजी महापुरुषांची प्रेरणादायी नावे देण्याचा निर्णय घेण्यात आला आहे. 

शासकीय निर्णयानुसार, राज्यातील एकूण ४४९ वसतिगृहांपैकी ४१६ वसतिगृहांच्या नावांमध्ये बदल करण्यास मान्यता देण्यात आली आहे. यानुसार आता मुलांच्या वसतिगृहांना 'डॉ बाबासाहेब आंबेडकर शासकीय वसतिगृह' तर मुलींच्या वसतिगृहांना 'सावित्रीबाई फुले शासकीय वसतिगृह' ही नावे असणार आहेत. केवळ विद्यमान वसतिगृहेच नव्हे, तर यापुढे सामाजिक न्याय विभागांतर्गत नव्याने सुरू होणाऱ्या सर्व मुला-मुलींच्या वसतिगृहांना देखील हीच नावे दिली जाणार असल्याचे यामध्ये नमूद करण्यात आले आहे.