मराठावाडा विद्यापीठ : संतपीठ प्रमाणपत्र अभ्यासक्रमांसाठी प्रवेश प्रक्रिया सुरू, २० मार्चपर्यंत मुदत

एज्युवार्ता न्यूज नेटवर्क 

अध्यात्मिक शिक्षण घेणाऱ्या विद्यार्थ्यांसाठी महत्त्वाची अपडेट समोर आली आहे. डॉ. बाबासाहेब आंबेडकर मराठवाडा विद्यापीठ (Dr. Babasaheb Ambedkar Marathwada University) संचालित पैठण येथील संतपीठ अंतर्गत नव्या सत्रासाठी प्रवेश प्रक्रिया सुरू (Admission process begins) करण्यात आली आहे. शैक्षणिक वर्ष २०२५-२६ (Academic year 2025-26) साठी विविध प्रमाणपत्र अभ्यासक्रमांच्या प्रवेशासंबंधी सविस्तर माहिती विद्यापीठाच्या संकेतस्थळावर प्रसिद्ध करण्यात आली आहे. इच्छुक आणि पात्र उमेदवारांसाठी प्रवेश अर्ज विद्यापीठाच्या संकेतस्थळावर उपलब्ध करण्यात आला आहे. त्यासाठी २० मार्च ही अंतिम (The deadline is March 20) मुदत आहे. 

संतपीठात भारतीय परंपरा व संस्कृती, संत संप्रदाय, संत साहित्य, कीर्तन, प्रवचन, तत्त्वज्ञानाशी संबंधित प्रमाणपत्र अभ्यासक्रम विद्यापीठाच्या शैक्षणिक व्यवस्थापनात सुरू आहे. नववी बॅच एक मार्चपासून सुरू होत असून त्यासाठी प्रवेश प्रक्रिया सुरू झाली आहे, असे कुलसचिव डॉ. प्रशांत अमृतकर यांनी कळविले. प्रवेश अर्ज विद्यापीठाच्या संकेतस्थळावर उपलब्ध असून तो संतपीठ पैठण येथे किंवा विद्यापीठाच्या केमिकल टेक्नॉलॉजी विभागाच्या कार्यालयात २० मार्चपर्यंत सादर करावा लागणार आहे. अंतिम मुदतीनंतर प्राप्त अर्जाचा विचार केला जाणार नाही. असे संतपीठाचे संचालक डॉ. प्रवीण वक्ते यांनी नमूद केले आहे.

नियमित व आभासी (ऑनलाइन) अशा दोन्ही पद्धतीने अभ्यासक्रम राबविण्यात येतील. किमान ७५ टक्के उपस्थिती अनिवार्य राहील. नियमित पद्धतीत प्रवेश क्षमता २० विद्यार्थी, तर आभासी पद्धतीत कमाल ५० विद्यार्थी असतील. एका शैक्षणिक वर्षात एकाच वेळी एकाच प्रमाणपत्र अभ्यासक्रमास प्रवेश दिला जाईल. सहा महिन्यांचे अभ्यासक्रम निवासी स्वरूपाचे नाहीत. त्यामुळे विद्यार्थ्यांना निवासाची व्यवस्था उपलब्ध नसेल.