BMC अभियंता भरती प्रक्रिया पुढे ढकलली; २६ नोव्हेंबरपासून भरता येणार अर्ज 

एज्युवार्ता न्यूज नेटवर्क 

बृहन्मुंबई महापालिकेअंतर्गत मोठ्या संख्येने कनिष्ठ अभियंता व दुय्यम अभियंत्या (BMC Engineer Recruitment Process) ही रिक्त पदे भरण्यासाठी भरती प्रक्रिया राबवण्यात येत आहे. गेल्या अनेक वर्षापासून प्रलंबित असलेल्या जागांसाठी मागील महिन्यात जाहिरात प्रसिद्ध करण्यात आली. त्यानुसार कनिष्ठ अभियंता (स्थापत्य), कनिष्ठ अभियंता (यांत्रिकी व विद्युत), दुय्यम अभियंता (स्थापत्य), दुय्यम अभियंता (यांत्रिकी आणि विद्युत) या पदांच्या एकूण ६९० जागांसाठी ही भरती प्रक्रिया राबवण्यात येत आहे. मात्र, आता ही भरती प्रक्रिया पुढे ढकलण्यात (Application submission date postponed) आली आहे. त्यानुसार २६ नोव्हेंबरपासून (Applications can be made from November 26th)उमेदवारांना अर्ज करता येणार आहेत. 

मुंबई पालिका प्रशासनाने काही मागील महिन्यात जाहिरात प्रसिद्ध केली आणि ११ नोव्हेंबर ते  २ डिसेंबर या कालावधीत उमेदवरांसडून अर्ज मागवण्यात येणार असल्याचे सांगितले. मात्र, त्यानंतर आवघ्या काही दिवसांत राज्यात विधानसभा निवडणूकीची आचारसंहिता लागू करण्यात आली. त्यामुळे पालिका प्रशासनावर ही भरती प्रक्रिया पुढे ढकलण्याची नामुष्की ओढावली. त्यामुळे आता नव्या वेळापत्रकानुसार उमेदवारांना २६ नोव्हेंबर ते १६ डिसेंबर या कालावधीत अर्ज करता येणार आहेत.

ज्या मुंबई पालिकेअंतर्गत ही भरती प्रक्रिया राबवण्यात येत आहे तिथे विधानसभा सार्वत्रिक निवडणूक २०२४ साठी २० नोव्हेंबर रोजी मतदान प्रक्रिया पार पडणार आहे. तर २३ नोव्हेंबर रोजी निवडणूकांची मतमोजणी होणार आहे. त्यानंतर आवघ्या काही दिवसांत म्हणजे २६ नोव्हेंबरपासून उमेदवारांकडून यासाठी अर्ज मागवण्यात आले आहेत. त्यामुळे मागील चार ते पाच वर्षापासून भरती प्रक्रियेची वाट पाहाणाऱ्या तरुणांना आता आणखीन काही दिवस वाट पाहावी लागणार आहे.