परीक्षा अर्ज न पोहचल्याने ८ हजार ८४८ विद्यार्थी परीक्षेपासून वंचित

एज्युवार्ता न्यूज नेटवर्क

डॉ. बाबासाहेब आंबेडकर मराठवाडा विद्यापीठ (Dr. Babasaheb Ambedkar Marathwada University) छत्रपती संभाजीनगर, संलग्न महाविद्यालयातील पदवी अभ्यासक्रमांच्या सत्र परीक्षेला (University Sessional Examination) सुरुवात झाली आहे. या परीक्षेमध्ये सहभागी होण्यासाठी ८४ हजार १८३ विद्यार्थ्यांनी अर्ज दाखल केले होते. त्यातील परीक्षेला सुरुवात होईपर्यंत ७५ हजार ४९२ विद्यार्थ्यांचे परीक्षा क्रमांक जनरेट करण्यात आले. तर काही विद्यार्थ्यांना विना हॉलतिकीट परीक्षा (Exam without hall ticket) देण्याची मुभा देण्यात आली. मात्र, या वेळी तब्बल ८ हजार ८४८ विद्यार्थ्यांनी अर्ज न भरल्याने त्यांना परीक्षेला बसता आले नाही. 

नवीन राष्ट्रीय शैक्षणिक धोरणानुसार विद्यापीठाशी संलग्न महाविद्यालयातील पदवी अभ्यासक्रमांच्या परीक्षांना चार जिल्ह्यांतील २६८ होम सेंटरवर मंगळवारपासून सुरुवात झाली. पदवीच्या १८ अभ्यासक्रमांना ८४ हजार ३४० विद्यार्थ्यांनी प्रवेश घेतला.  त्यातील ८४ हजार १८३ विद्यार्थ्यांनी परीक्षेसाठी अर्ज केला होता. त्यापैकी ७५ हजार ४९२ विद्यार्थ्यांचे हॉलतिकीट परीक्षा विभागाने परीक्षेला सुरुवात होण्याच्या मिनिटापर्यंत ऑनलाइन जनरेट केले. तर उर्वरित ८ हजार ८४८ विद्यार्थ्यांचे परीक्षा अर्जच विद्यापीठाकडे पोहोचले नसल्यामुळे संबंधितांचे हॉलतिकीट तयार झाले नाहीत. त्यामुळे या विद्यार्थ्यांना परीक्षेला बसता आले नाही. 

उशीरा अर्ज केलेल्या विद्यार्थ्यांना परीक्षा सुरू होईपर्यंत अनेक केंद्रांवर हॉल तिकीट मिळाले नव्हते. अशावेळी विद्यापीठाच्या परीक्षा विभागाकडून या विद्यार्थ्यांचे हॉल तिकीट ऑनलाइन जनरेट करून महाविद्यालयांच्या लॉगिनमध्ये पाठविण्यात आले. मात्र, परीक्षेला सुरुवात होईपर्यंत हे हॉलतिकीट डाऊनलोड झाले नाहीत. त्यामुळे परीक्षा विभागाने दिलेल्या परीक्षा क्रमांकावर ऐनवेळी परीक्षा देण्याची सुविधा उपलब्ध करून देण्यात आली.

परीक्षेसाठी आलेल्या विद्यार्थ्यांना रोखले..

बी. सीएस. संगणकशास्त्र या विषयात प्रथम सत्राची परीक्षा देणाऱ्या १२६ विद्यार्थ्यांना ऐनवेळी डॉ. बाबासाहेब आंबेडकर कला व वाणिज्य महाविद्यालयातील केंद्रावर परीक्षेपासून रोखल्याचा प्रकार घडला. या विद्यार्थ्यांची तातडीने पर्यायी व्यवस्था करून होम सेंटरवर परीक्षा घेतल्याची माहिती परीक्षा संचालक डॉ. भारती गवळी यांनी दिली. तसेच या महाविद्यालयास कारणे दाखवा नोटीस बजावण्यात येणार असून, चौकशी समिती नेमणार असल्याचे त्यांनी सांगितले. 
_____________________________________

जे काही ८ हजार ८४८ विद्यार्थी आहेत त्यांनी परीक्षा अर्जच भरलेले नाहीत. ही संख्या जास्त दिसत आहे मात्र, हे विद्यार्थी वेगवेगळ्या शाखेतील आहेत. यापैकी काही विद्यार्थी इतर परीक्षेचा अभ्यास करत असतात. आपले शैक्षणिक नुससान होऊ नये म्हणून प्रवेश घेतलेले हे विद्यार्थी असतात. प्रत्येक वर्षी जवळपास एवढी संख्या असते. मात्र, आता त्याला फुगवून सांगण्यात येत आहे. 

- डॉ. भारती गवळी, संचालक, परीक्षा व मूल्यमापन मंडळ, डॉ. बाबासाहेब आंबेडकर मराठवाडा विद्यापीठ, छत्रपती संभाजीनगर