राज्य शिक्षक गुणगौरव पुरस्कारासाठी अर्ज करण्यास सुरूवात; 31 जुलैपर्यंत करता येणार अर्ज

एज्युवार्ता न्यूज नेटवर्क 

राज्य शासनातर्फे दिल्या जाणाऱ्या क्रांतीज्योती सावित्रीमाई फुले राज्य शिक्षक गुणगौरव पुरस्कारासाठी (Krantijyoti Savitrimai Phule State Teacher Merit Award)अर्ज भरण्याची प्रक्रिया सुरू झाली आहे. इच्छुकआणि पात्र शिक्षक येत्या 31 जुलैपर्यंत अर्ज भरू शकणार आहेत. शिक्षण विभागातर्फे नुकताच पुरस्काराच्या नियमावलीत बदल (Changes to the award rules)करण्यात आला असून त्याबाबतची माहिती प्रसिद्ध करण्यात आली.त्यानंतर आता शिक्षण विभागाकडून शैक्षणिक वर्ष 2024-25 साठी राज्य शिक्षक गुणगौरव पुरस्कारासाठी अर्ज मागविण्यात आले असून हे पुरस्कार वस्तुनिष्ठ निकषाद्वारे दिले जाणार आहेत. 

शिक्षक पुरस्कारासाठी अर्ज करणाऱ्या उमेदवारांचे अर्ज 1 ऑगस्ट ते 3 ऑगस्ट या कालावधीत संचालक स्तरावर तपासले जातील. त्यानंतर 4 ऑगस्ट ते 8 ऑगस्ट या कालावधीत जिल्हास्तरावर प्रत्यक्ष शाळा भेट दिली जाईल. पुढे 11 ऑगस्ट ते 14 ऑगस्ट या कालावधीत जिल्हास्तरावरील मुलाखती आणि पडताळणी करून संचालक कार्यालयाकडे शिफारस केली जाईल. राज्यस्तरावरील मुलाखती या 18 ते 21 ऑगस्ट या कालावधीत घेतल्या जातील. 22 ते 24 ऑगस्टपर्यंत राज्यशिक्षक पुरस्कारासंदर्भातील सर्व काम संचालक स्तरावरून पूर्ण केले जाईल. त्यानंतर 25 ऑगस्ट रोजी राज्य निवड समितीच्या सदस्यांची अंतिम बैठक घेतली जाईल. निवड समितीने अंतिम शिफारस केलेल्या शिक्षकांच्या यादीसह सर्व माहिती शासनाकडे 28 ऑगस्ट रोजी सादर केले जाईल. त्यानंतर 1 सप्टेंबर रोजी शासन निर्णय प्रसिद्ध करून पात्र शिक्षक पुरस्कार उमेदवारांची नावे घोषित केली जातील आणि प्रत्यक्ष पुरस्कार वितरण समारंभ 5 सप्टेंबर रोजी आयोजित केला जाईल.