अमरावती विद्यापीठाचा अजब प्रकार समोर, परीक्षेपूर्वीच पर्यवेक्षकांना मानधन वाटप.. 

एज्युवार्ता न्यूज नेटवर्क 

संत गाडगेबाबा अमरावती विद्यापीठाचा (Sant Gadge Baba Amravati University) अजब प्रकार समोर आला आहे. विद्यापीठाकडून घेण्यात येणार्‍या एम. पेट परीक्षा (M. PET Exam) या जूनमध्ये होतील मात्र, त्यापूर्वीच नियुक्त करण्यात आलेल्या पर्यवेक्षकाच्या मानधनावर (Supervisor's salary) मोठ्या प्रमाणवर उधळपट्टी केली जात असल्याचा धक्कादायक प्रकार समोर आला आहे. एमपीएससी, नेट-सेट परीक्षांसाठी दर दिवशी जास्तीत जास्त १ हजार रुपये मानधन दिले जाते. मात्र, एम.पेट परीक्षेसाठी चक्क ३ हजार रुपये प्रतिपाळी मानधन (M.Pet exam honorarium Rs. 3 thousand per shift) देण्याची तरतूद करण्यात आली आहे. त्यामुळे विद्यापीठ पर्यवेक्षकांवर जरा जास्तच मेहरबान झाल्याचे दिसून येत आहे. 

संत गाडगेबाबा अमरावती विद्यापीठ सध्या खुप मोठ्या आर्थिक संकटात असल्यामुळे अनेक खर्चाला कात्री लावण्यात आली आहे. असे असताना एम. पेट परीक्षा होण्यापूर्वीच २२ लाखांची अग्रीम रक्कम उचलण्यात आली आहे. त्यामुळे अनेक तर्क वितर्क आणि शंका उपस्थित केल्या जात आहेत. परीक्षा झाल्यानंतर पर्यवेक्षकांकडून सादर देयकांनतर रक्कम मंजूर केली जाते. मात्र, असे असताना इतिहासात पहिल्यांदाच परीक्षेपूर्वी रक्कम उचलली गेल्याने चर्चेला पेव फुटले आहेत. 

विद्यापीठाकडून घेण्यात येणाऱ्य एम. पेट परीक्षा या जूनमध्ये घेण्यात येतील, अशी माहिती परीक्षा व मूल्यमापन मंडळाचे संचालक डॉ. नितीन कोळी यांनी दिली आहे. विद्यापीठ मोठ्या आर्थिक संकटात असताना, पैसे उधळण्यापेक्षा शुल्क का कमी करीत नाही, असा सवाल उपस्थित होत आहे. ऑनलाइन कंत्राट दिल्यावर मर्जीतील अधिकारी, कर्मचाऱ्यांना पर्यवेक्षक नेमून त्यांना हजारो रुपये देण्यामागे नक्की डाव कोणाचा? असा सवाल शिक्षण क्षेत्रातून बाहेर येत आहे.