SPPU विद्यापीठात भरती घोटाळ्याचा आरोप; आंबेडकरी संघटनांचा आक्रमक पवित्रा!

एज्युवार्ता न्यूज नेटवर्क 

 सावित्रीबाई फुले पुणे विद्यापीठाशी संलग्न महाविद्यालयांमध्ये कायमस्वरूपी सहाय्यक प्राध्यापक पदभरती प्रक्रियेत कथित भ्रष्टाचार झाल्याच्या आरोपावरून आंबेडकरी पक्ष व विविध सामाजिक संघटनांच्या वतीने विद्यापीठाच्या मुख्य इमारत परिसरात तीव्र आंदोलन करण्यात आले. या आंदोलनाची पूर्वकल्पना दहा दिवसांपूर्वीच कुलगुरूंना लेखी स्वरूपात देण्यात आली होती. मात्र, आंदोलकांना भेटण्यासाठी कुलगुरू उपस्थित राहिले नाहीत. त्याऐवजी प्र. कुलगुरू, प्रभारी कुलसचिव तसेच परीक्षा व मूल्यांकन मंडळाचे प्रभारी संचालक उपस्थित होते. आंदोलक शिष्टमंडळाशी कुलगुरू कार्यालयात संवाद साधण्यात आला; मात्र सकारात्मक चर्चा होऊ शकली नाही. यावेळी प्रभारी कुलसचिव यांनी आंदोलक शिष्टमंडळाला लेखी पत्र देत १२ फेब्रुवारी २०२६ रोजी दुपारी १२.३० वाजता बैठकीसाठी बोलावले आहे. 

यावेळी अधिसभा सदस्य प्रा. डॉ. हर्ष गायकवाड यांनी कुलगुरूंनी दुसऱ्या व्यक्तीकडे पदभार न देता विद्यापीठ परिक्षेत्र सोडल्याबद्दल नाराजी व्यक्त केली. आंदोलकांशी चर्चा न करणे व अपमानजनक वागणूक देणे गंभीर स्वरूपाचे असल्याचा आरोप त्यांनी केला. आरपीआय महिला आघाडीच्या महासचिव संघमित्रा गायकवाड यांनी कुलगुरूंनी प्रत्यक्ष भेटून चुकीच्या नियुक्त्या रद्द कराव्यात, अन्यथा आंदोलन अधिक तीव्र केले जाईल, असा इशारा दिला.

 दरम्यान, आंदोलनादरम्यान एकूण नऊ प्रमुख मागण्या मांडण्यात आल्या. त्यामध्ये महाराष्ट्र शिक्षण संस्था, राजगड शिक्षण संस्था तसेच अहिल्यानगर जिल्हा मराठा विद्या प्रसारक संस्थेमधील अनुदानित सहाय्यक प्राध्यापक पदभरतीतील कथित भ्रष्टाचाराची चौकशी, संबंधित अधिकाऱ्यांनी केलेल्या नियुक्त्या रद्द करणे. तसेच अधिसभा सदस्यांविरोधात केलेल्या अपमानजनक उल्लेखाबाबत ॲट्रॉसिटी अंतर्गत गुन्हा दाखल करण्याची मागणी करण्यात आली. या आंदोलनात संघमित्रा गायकवाड, देवाभाऊ येणकुळे, बाळासाहेब रोकडे, बुद्धीशा रधवे, मिलिंद बोडके, संदीप सानप, हनुमंते धोंडीबा, समुद्रे डावरे, राहुल ससाणे यांच्यासह आंबेडकरी पक्ष व सामाजिक संघटनांचे पदाधिकारी सहभागी झाले होते.