शिक्षणापासून ते डिजीटल तंत्रज्ञानापर्यंत केलेली प्रगती लोकशाहीला उज्वल करणारी; उपराष्ट्रपती

एज्युवार्ता न्यूज नेटवर्क 

 भारताला एकेकाळी स्लिपिंग जायंट म्हणून ओळखले (Slipping Giant Identity) जायचे. ती ओळख आता आपण पूर्णपणे पुसून काढली काही. सध्या तंत्र कौशल्यात एक मैलाचा टप्पा आपण गाठला आहे. शिक्षणापासून ते डिजीटल तंत्रज्ञानापर्यंत (Education and Digital Technology) आपण साध्य केलेली प्रगती  ही लोकशाहीच्या भवितव्याला अधिक उज्वल करणारी असल्याचे प्रतिपादन उपराष्ट्रपती जगदीप धनखड (Vice President Jagdeep Dhankhad) यांनी केले.

रामदेवबाबा विद्यापीठातील डिजिटल टॉवरच्या कोनशिलेचे अनावरण व लोकार्पण त्यांच्या हस्ते करण्यात आले. यावेळी आयोजित विशेष समारंभात उपराष्ट्रपती बोलत होते. यावेळी राज्यपाल सी.पी.राधाकृष्णन, उपमुख्यमंत्री देवेंद्र फडणवीस, माजी राज्यपाल बनवारीलाल पुरोहित, रामदेवबाबा सार्वजनिक समितीचे अध्यक्ष सत्यनारायण नुवाल, चान्सलर डॉ. एस. एस. मंथा, कुलगुरू डॉ. आर. एस. पांडे, यांच्यासह आदी मान्यवर उपस्थित होते.

जागतिक लोकशाही दिनाचा धागा पकडून त्यांनी लोकशाहीच्या सशक्तीकरणात गुणवत्तापूर्ण शिक्षणाचे महत्त्व अधोरेखित केले. शिक्षण ही सेवा आहे. सामाजिक उत्तरदायित्वाचे यात सामावलेले भान आहे. शिक्षणाच्या व्यवसायापेक्षा नैतिकतेला, आदर्श विद्यार्थी घडवायला रामदेवबाबा शिक्षण संस्थेने आजवर दिलेल्या योगदानाचा उपराष्ट्रपतींनी गौरव केला.

आर्टिफिशियल इंटेलिजन्स, मशीन लर्निंग, ब्लॉकचेन यासारख्या अत्याधुनिक तंत्रज्ञानाचे महत्त्व धनखड यांनी विषद केले. तंत्रज्ञानाच्या माध्यमातून आव्हाने आणि संधी दोन्ही निर्माण होत असतात. हीच आव्हाने संधीत रुपांतरित करण्यासाठी विद्यार्थ्यांनी पुढे यावे, असे आवाहन त्यांनी केले.