संत गाडगेबाबा विद्यापीठाच्या सिनेट सभेवर आचारसंहितेचे ग्रहण.. 

एज्युवार्ता न्यूज नेटवर्क 

भारतीय निवडणूक आयोगाने (Election Commission of India) राज्यातील विधानसभा निवडणुकीच्या (Assembly elections) पार्श्वभूमीवर मंगळवार दि. १५ ऑक्टोबरपासून आचारसंहिता घोषित (Code of Conduct announced) केली आहे. त्यामुळे संत गाडगेबाबा अमरावती विद्यापीठाने (Sant Gadgebaba Amravati University) २४ ऑक्टोबर रोजी होवू घातलेल्या सिनेट सभेला (Senate meeting) आचारसंहितेचे ग्रहण लागणार असल्याचे सांगण्यात येत आहे.

संत गाडगेबाबा अमरावती विद्यापीठाची सिनेट सभा २४ ऑक्टोबर रोजी होऊ घातली आहे. मात्र, मंगळवारी आयोगाने विधानसभा निवडणुकीची आचारसंहिता लागू केली. त्यामुळे या अधिसभेत होणारे निर्णय, विविध विषयांना मान्यता या बाबी राजकीय आणि आर्थिकदृष्ट्या बाधित असणार आहे. किंबहुना हा प्रकार आदर्श आचारसंहितेचे उल्लंघन करणारा असल्याने सिनेट सभा पुढे ढकलण्यात येणार असल्याची दाट शक्यता वर्तवण्यात येत आहे. 

विद्यापीठाच्या सिनेट सभेत प्राचार्य, राजकीय विचारांनी प्रेरित व्यक्ती,सामाजिक कार्य, उद्योग, पदवीधर, स्थानिक स्वराज्य संस्थांचे प्रतिनिधी, राज्यपाल नियुक्त आदी क्षेत्राशी निगडित सदस्य म्हणून कामकाजात सहभाग नोंदवितात. दर सहा महिन्यांनी अधिसभेचे आयोजन केले जाते. मात्र, यंदा ऐन विधानसभा निवडणुकीच्या तोंडावर आलेल्या या सिनेट सभेला ग्रहण लागण्याची शक्यता आहे. 

सिनेट सभेत विविध महत्त्वाचे विषय मार्गी लावले जातात. त्यामुळे प्रत्येक सिनेट सदस्य मोठ्या आतुरतेने अधिसभेची प्रतीक्षा करतात. २३ ऑक्टोबर रोजी होणाऱ्या अधिसभेत पुरवणी अर्थसंकल्पास मान्यता प्रदान करण्यात येणार आहे. तसेच या अर्थसंकल्पात काही सूचना अथवा दुरुस्ती असल्यास ते अधिसभेत केले जाणार आहे. मात्र, विधानसभा निवडणुकीची आचारसंहिता मंगळवारपासून लागू झाल्याने सिनेट सभेवरही त्याचे पडसाद पडण्याचे संकेत आहेत.