एनडीआरएफ सुदुंबरे कॅम्पस : पुण्यात नव्याने स्थापन झालेल्या केंद्रीय विद्यालयात प्रवेश प्रक्रिया सुरू

एज्युवार्ता न्यूज नेटवर्क

एनडीआरएफ कॅम्पस, सुदुंबरे, पुणे येथे नव्याने स्थापन झालेल्या केंद्रीय विद्यालयात (Kendriya Vidyalaya Sudumbare, Pune) शैक्षणिक सत्र 2025-26 (Academic Session 2025-26) साठी प्रवेश प्रक्रिया सुरू (Admission process begins) झाली आहे. या विद्यालयात इयत्ता 1 ते 5 मध्ये प्रवेश दिला जाणार असून त्यासाठी ऑफलाइन पद्धतीने अर्ज मागवण्यात आले आहेत. अर्ज प्रक्रिया सुरू झाली असून त्याची अंतिम मुदत २० जुलैपर्यंत (Deadline July 20) देण्यात आली आहे. हा उपक्रम सुदुंबरे परिसरातील विद्यार्थ्यांना गुणवत्तापूर्ण शिक्षणाच्या संधी उपलब्ध करून देणारा ठरणार असल्याचे, विद्यालयाच्या वतीने म्हटले आहे.

प्रसिद्ध करण्यात आलेल्या माहितीनुसार, एनडीआरएफ कॅम्पसमधील केंद्रीय वि‌द्यालयाच्या तात्पुरत्या प्रशासकीय कार्यालयीन वेळेनुसार सकाळी 9:00 ते दुपारी 3:00 वाजेपर्यंत अर्ज प्रक्रिया सुरू राहणार आहे. वर्ग पहिला आरटीई व आवश्यकयता असल्यास लॉटरी‌द्वारे निवड प्रक्रिया पार पाडली जाणार आहे. 22 जुलै 2025 रोजी लॉटरी‌ प्रक्रिया पार पडेल. त्यानंतर तात्पुरती प्रवेश यादी 23 जुलै 2025 रोजी प्रसिद्ध केली जाईल. पालकांना 23 जुलै ते 30 जुलै 2025 या कालावधीत प्रवेश प्रक्रिया पूर्ण केली जाईल.

सरकारच्या नियमानुसार, एससी, एसटी, ओबीसी (नॉन क्रीमी लेयर) आणि आरटीई या प्रवर्गानुसार सवलतीच्या जागा आरक्षित करण्यात आल्या आहेत. विद्यालय व्यवस्थापन समितीचे अध्यक्ष आणि एनडीआरएफचे कमांडंट आर. बी. सिंह यांनी नव्या विद्यालयाच्या स्थापनेबद्दल समाधान व्यक्त केले असून, या विद्यालयामुळे परिसरातील वि‌द्यार्थ्यांना 'दर्जेदार शिक्षण मिळण्यास मदत होणार आहे, असे ते म्हणाले. सर्व पालकांना विनंती करण्यात येते की त्यांनी अर्ज वेळेत घ्यावेत आणि मुदतीपूर्वी भरून जमा करावेत, जेणेकरून शेवटच्या क्षणी होणारी धावपळ टाळता येईल. हे विद्यालय सुदुंबरे परिसरातील शिक्षण विकासात महत्त्वपूर्ण योगदान देईल, असे सिंह यांनी म्हटले आहे.