RTE प्रवेशाच्या पहिल्या प्रतिक्षा यादीतील प्रवेश प्रक्रियेला सुरूवात

एज्युवार्ता न्यूज नेटवर्क 

शिक्षण हक्क कायद्यांतर्गत (RTE) राबविल्या जाणाऱ्या आरटीई प्रवेश प्रक्रियेत नियमित फेरीनंतर पहिल्या प्रतीक्षा यादी मधील विद्यार्थ्यांच्या प्रवेश प्रक्रियेला मंगळवार (दि.18 मार्च) पासून सुरुवात होणार आहे. त्यामुळे आरटीई प्रवेशाच्या प्रतीक्षेत असणाऱ्या अनेक पालकांना मंगळवारपासून विद्यार्थ्यांच्या प्रवेशाबाबतचे एसएमएस प्राप्त होणार आहेत.परंतु, पालकांनी केवळ एसएमएस वर अवलंबून न राहता आरटीई पोर्टलवर 'अर्जाची स्थिती' या टॅब वर आपल्या बालकाचा अर्ज क्रमांक टाकून अर्जाची स्थिती पहावी, असे आवाहन करण्यात आले आहे.

शिक्षण विभागातर्फे 2025 26 या शैक्षणिक वर्षासाठी ऑनलाइन आरटीई प्रवेश प्रक्रिया राबवले जात आहे 10 फेब्रुवारी रोजी ऑनलाईन लॉटरीची सोडत काढण्यात आली. त्यातून निवड यादीतील बालकांचे प्रवेश निश्चित करण्यासाठी 10 मार्च पर्यंत मुदत देण्यात आली होती. आता सर्व जिल्ह्यातील निवड यादीतील प्रवेश प्रक्रिया पूर्ण झाली आहे. त्यामुळे आता प्रतीक्षा यादीतील प्रवेश प्रक्रिया सुरू करण्यात आली आहे. प्रतीक्षा यादी टप्पा क्रमांक १ मधील प्रवेश पात्र बालकांचे प्रवेश सुरू करण्यात आले आहे.

पालकांनी वेळोवेळी दिलेल्या सूचनांचे अवलोकन करावे.तसेच प्रतीक्षा यादीतील बालकांच्या पालकांनी त्यांच्या अलॉटमेंट लेटरची प्रिंट काढावी. अलॉटमेंट लेटर व आवश्यक कागदपत्रे घेऊन दिलेल्या मुदतीत नजीकच्या पडताळणी केंद्रावर जाऊन पडताळणी समितीकडून 18 मार्च ते 24 मार्च या कालावधीमध्ये कागदपत्रांची तपासणी करून आपल्या बालकाचा ऑनलाइन प्रवेश निश्चित करावा. प्रवेश निश्चित झाल्याची पावती घेऊन शाळेत जावे आणि प्रवेश निश्चित करावा, असे राज्याचे प्राथमिक शिक्षण संचालक शरद गोसावी यांनी परिपत्रकाद्वारे स्पष्ट केले आहे.