गोखले इन्स्टिट्युटचे कुलगुरू डॉ. रानडे यांच्या नियुक्तीबाबत मोठा ट्विस्ट

एज्युवार्ता न्यूज नेटवर्क

विद्यापीठ अनुदान आयोगाच्या (UGC) निकषांचे उल्लंघन केल्यामुळे अर्थशास्त्रज्ञ डॉ. अजित रानडे (Economist Dr. Ajit Ranade) यांची गोखले राज्यशास्त्र आणि अर्थशास्त्र संस्था अभिमत विद्यापीठाच्या (Gokhale Institute of Politics and Economic) कुलगुरू पदावरून (Vice-Chancellor) सप्टेंबर महिन्यात हटवण्यात आले होते. मात्र, आता डॉ. रानडे यांना हटवण्याचा निर्णय अखेर रद्द करण्यात आला आहे. (The decision was eventually overturned) याबाबतची माहिती गोखले इन्स्टिट्युटने मुंबई उच्च न्यायालयात (Bombay High Court) दिली आहे.  

विद्यापीठाच्या वतीने मंगळवार (दि. २२) रोजी याबाबतचा आदेश कुलपतींनी मागे घेतल्याची माहिती दिली. तसेच या प्रकरणी पुन्हा कारवाई केल्यास डॉ. रानडे यांना नैसर्गिक न्यायाच्या तत्त्वाप्रमाणे त्यांचे म्हणणे मांडण्याची संधी दिली जाईल, असंही विद्यापीठाच्या वतीनं उच्च न्यायालयाला सांगण्यात आलं आणि त्यावर न्यायालयाने विद्यापीठाचे हे म्हणणे मान्य केले आहे. त्यामुळे रानडे यांच्याबाबतीत सुनावणी घेऊन निर्णय घेतला जाईल, असे गोखले संस्थेकडून उच्च न्यायालयाला सांगण्यात आले आहे. हे प्रकरण मंगळवारी विद्यापीठाच्या वतीने न्यायमूर्ती रवींद्र घुगे यांच्या अध्यक्षतेखालील खंडपीठासमोर सादर करण्यात आले आहे.

दरम्यान, डॉ. रानडे यांची नियुक्ती रद्द करण्याच्या निर्णयाच्या अंमलबजावणीला दिलेली तात्पुरती स्थगिती न्यायालयाकडून कायम ठेवण्यात आली आहे. त्याचबरोबर, डॉ. रानडे यांना कुलगुरू पदावरून हटवण्याच्या निर्णयानंतर या पदाचा अतिरिक्त कार्यभार सांभाळणारे संस्थेतील वरिष्ठ प्रा. दीपक साहा यांना संस्थेच्या दैनंदिन प्रशासकीय कामकाजासंदर्भाबाबतचे निर्णय घेण्याची मुभा असणार आहे, असेही न्यायालयाने स्पष्ट केले आहे.