विद्यापीठाचा नियोजनशून्य कारभार चव्हाट्यावर, परीक्षा अर्जात जुन्या अभ्यासक्रमाचे विषय 

एज्युवार्ता न्यूज नेटवर्क 

सावित्रीबाई फुले पुणे विद्यापीठाचा (Savitribai Phule Pune University) नियोजनशून्य कारभार पुन्हा एकदा चव्हाट्यावर आहे आहे.  विद्यार्थांना परीक्षा अर्ज भरताना मागील अभ्यासक्रमाचे विषय देण्यात आले आहेत. विद्यापीठातर्फे सध्या ऑक्टोबर सत्रासाठी परीक्षा अर्ज भरण्याची प्रक्रिया सुरू (Exam application process Starts) आहे. मात्र, यावेळी पत्रकारीता व विज्ञान शाखेसह इतर अर्ज भरताना मागील अभ्यासक्रमाचे विषय (Previous course topics) दिसत असल्याने विद्यार्थ्यांना समस्यांना सामोरे जावे लागत आहे. 

विद्यापीठाने लवकरात लवकर या समस्येवर मार्ग काढावा, अशी मागणी विद्यार्थ्यांकडून होत आहे. यावर्षी प्रवेश घेतलेल्या विद्यार्थ्यांना नव्या राष्ट्रीय शैक्षणिक धोरणानुसार विषय आहेत. तर, मागील वर्षापर्यंत प्रवेश घेतलेल्या विद्यार्थ्यांना २०१९ पॅटर्ननुसार विषय आहेत. विद्यापीठात फक्त पत्रकारिता विभागात गेल्या वर्षी नव्या शिक्षण धोरणानुसार आणि त्यासंदर्भातील विषय लागू झाले. इतर विभागांत चालू वर्षापासून नव्या काही शिक्षण संस्था आणि धोरणानुसार अभ्यासक्रम लागू झाला आहे. त्यामुळे जुन्या नव्या अभ्यासक्रमाचा घोळ झाल्याने प्रथम वर्षाचे अर्ज भरताना जुनेच विषय दिसत असल्याने विद्यार्थ्यांची डोकेदुखी वाढली आहे. 

अर्ज भरताना मागील अभ्यासक्रमाचे विषय दिसत असल्याने विद्यापीठांतर्गत येणाऱ्या महाविद्यालयांनी अर्जामध्ये सुधारणा करण्याची मागणी केली. संबंधित शाखा विभाग, परीक्षा विभाग आणि आयटी विभाग एकमेकांवर जबाबदारी ढकलून टोलवाटोलवी करत आहेत. जुन्या आणि नव्या अभ्यासक्रमाच्या रचनेमुळे हा सारा घोळ झाला असल्याने विद्यापीठाचा नियोजनशून्य कारभार चव्हाट्यावर आला आहे. यासंदर्भात विद्यापीठाकडून कॉलेज, विद्यार्थ्यांना कुठलीही माहिती दिली जात नसल्याने याचा नाहक मनस्ताप विद्यार्थ्यांना सहन करावा लागत आहे.

-----------------------

काल सकाळी काही विद्यार्थ्यांना विषय भरताना अडचणी येत असल्याचे समोर आले. पत्रकारीता, विज्ञान शाखेसह इतर प्रथम वर्षाच्या विद्यार्थ्यांना अडचणी उद्भवल्याचे सांगण्यात आले. आज दुपारनंतर परीक्षा विभागाची बोलून यामधील काही तांत्रिक त्रुटी समजून घेऊन त्या सोडवण्याचा प्रयत्न केला जाईन. त्यानुसार पुढील प्रक्रिया पार पडणार आहे. सध्याकाळपर्यंत यामधील सर्व अडचणी दूर होतील. विद्यार्थ्यांचे शैक्षणिक हित लक्षात घेता, परीक्षा अर्ज भरण्यासाठी वाढीव तारीख दिली जाऊ शकते. 

- सागर वैद्य, मॅनेजमेंट कौन्सिल मेंबर, सावित्रीबाई फुले पुणे विद्यापीठ