वैद्यकीय अभ्यासक्रमासाठी 75 हजार जागा वाढणार

एज्युवार्ता न्यूज नेटवर्क 

यावर्षी NEET UG परीक्षेसाठी (NEET UG Exam) विक्रमी २४.०६ लाख विद्यार्थ्यांची नोंदणी (Registration) करण्यात आली होती पण या अभ्यासक्रमाच्या जागा कमी असल्यामुळे बर्‍याच विद्यार्थ्यांच्या पदरी निराशा पडली. पण आता केंद्र शासनाने (Central Govt) विद्यार्थ्यांचे (students) हित लक्षात घेत देशभरात येत्या पाच वर्षात मेडीकलच्या 75 हजार जागा वाढवण्याचा निर्णय (Decision to increase 75 thousand seats) घेतला आहे. 

याविषयी अधिक माहिती देताना, केंद्रीय आरोग्य मंत्री जेपी नड्डा म्हणाले की, राष्ट्रीय वैद्यकीय आयोगाने (NMC) गेल्या चार वर्षांत यूजी आणि पीजी वैद्यकीय जागांची संख्या 25 हजारांनी वाढवली आहे. वैद्यकीय व्यावसायिकांची वाढती मागणी लक्षात घेऊन केंद्राने पुढील पाच वर्षांत सध्याच्या वैद्यकीय जागांमध्ये दरवर्षी १५ हजारांनी वाढ करण्याचे उद्दिष्ट ठेवले आहे. केंद्राने येत्या पाच वर्षांत देशात ७५,००० वैद्यकीय जागा वाढवण्याचे ठरवले आहे. 

केंद्रीय आरोग्य सचिव अपूर्व चंद्रा (Union Health Secretary Apoorva Chandra) म्हणाले,  आतापर्यंत मेडिकलच्या जागांमध्ये १२ हजारांनी वाढ करण्यात आली असून लवकरच १५ हजारांचे लक्ष्य गाठले जाईल. एमबीबीएस आणि सुपर स्पेशालिटी पीजी अभ्यासक्रमांची एकूण जागांची संख्या वाढवण्यात आली आहे. वैद्यकीय महाविद्यालयातील खाटांची संख्याही वाढणार आहे. दरवर्षी नवीन वैद्यकीय महाविद्यालये बांधली जातात आणि एमबीबीएस आणि पीजी अभ्यासक्रमांच्या जागा वाढवण्याचीही मागणी होत आहे.

केंद्रीय आरोग्य मंत्रालयाच्या आकडेवारीनुसार देशात 2023-24 मध्ये वैद्यकीय महाविद्यालयांची संख्या 706 होती, ती 2024-25 मध्ये 766 झाली आहे. वर्ष  2013-14 च्या तुलनेत आतापर्यंत यात 98 टक्के वाढ झाली आहे. सध्या देशात 766 (423 सरकारी आणि 343 खाजगी) वैद्यकीय महाविद्यालये आहेत.

भारतात एमबीबीएसच्या जागांची संख्या
2023-24 मध्ये एमबीबीएसच्या जागा 1,08,940 होत्या, त्या 2024-25 मध्ये 1,15,812 पर्यंत वाढल्या आहेत. 2013-14 मध्ये देशात 51,348 वैद्यकीय जागा होत्या आणि गेल्या 10 वर्षात त्यामध्ये 64,464 म्हणजेच 125 टक्के वाढ झाली आहे.

भारतातील पीजी वैद्यकीय जागा
वैद्यकीय PG जागा 2023-24 मध्ये 69,024 वरून 2024-25 मध्ये 73,111 पर्यंत वाढल्या आहेत. 2013-14 मध्ये 31,185 जागा होत्या, त्या 2024-25 मध्ये वाढून 73,111 झाल्या आहेत. पीजी जागांची संख्या 39,460 म्हणजेच 127 टक्क्यांनी वाढली आहे.