पुणे विभागात 11 वी प्रवेशासाठी पहिल्या दिवशी 30 हजार विद्यार्थ्यांची नोंदणी 

एज्युवार्ता न्यूज नेटवर्क 

11th Admission: राज्याच्या शालेय शिक्षण विभागातर्फे राबविल्या जाणाऱ्या इयत्ता अकरावी प्रवेशाच्या विद्यार्थी नोंदणी प्रक्रियेला सोमवारपासून सुरुवात झाली असून पहिल्याच दिवशी पुणे विभागातील 30 हजार 821 विद्यार्थ्यांनी नोंदणी केली आहे. त्याचप्रमाणे पुणे विभागातर्फे अकरावी प्रवेश प्रक्रियेसाठी प्रवेश नियंत्रण समिती व मदत कक्ष स्थापन करण्यात आले आहेत.

पुणे विभागीय शिक्षण उपसंचालक कार्यालयाने इयत्ता अकरावी प्रवेश प्रक्रियेची माहिती प्रसिद्ध केली असून विभागातर्फे पुणे विभागीय शिक्षण उपसंचालक सुनंदा वाखारे यांच्या अध्यक्षतेखाली प्रवेश नियंत्रण समिती स्थापन करण्यात आले आहे. त्यात सुधीर भोसले, विक्रम काळे, सचिन हलदुले,सुवर्णा फणसे आणि सहाय्यक संचालक ज्योती परिहार यांचा सदस्य सचिव म्हणून समावेश करण्यात आला आहे. पुणे विभागातील 1 हजार 521 कॉलेजसाठी ही नोंदणी प्रवेश प्रक्रिया राबवली जात आहे. पुणे जिल्ह्यातील 20 हजार 511 विद्यार्थ्यांनी, अहिल्यानगर जिल्ह्यातील 6 हजार 774 विद्यार्थ्यांनी तर सोलापूर जिल्ह्यातील 3 हजार 536 विद्यार्थ्यांनी ऑनलाइन प्रवेश प्रक्रियेसाठी पहिल्याच दिवशी नोंदणी केली आहे.

पुणे विभागातर्फे जिल्हास्तरावर जिल्हा निहाय प्रत्येकी एक मदत कक्ष स्थापन करण्यात आला असून तालुका स्तरावर पुणे अहिल्यानगर व सोलापूर जिल्ह्यासाठी प्रत्येकी 15 मदत कक्ष स्थापन केले आहेत. या समिती व मदत कक्षाच्या माध्यमातून विद्यार्थी व महाविद्यालयांच्या अडचणी सोडवण्याचे काम सुरू आहे असे शिक्षण विभागातर्फे कळविण्यात आले आहे.