मराठमोळ्या खासदाराने २०० सेवानिवृत्त शिक्षकांना घडवली संसद वारी..

एज्युवार्ता न्यूज नेटवर्क

शिक्षक हे समाज घडवणारे खरे शिल्पकार आहेत. शिक्षकांच्या संस्कारामुळे प्रत्येक विद्यार्थी घडत असतो. याचे भाव ठेवत एका मराठमोळ्या खासदाराने २०० पेक्षा अधिक सेवानिवृत्त (200 retired teachers) शिक्षकांची संसद वारी (Parliament tour) घडवून आणली आहे. त्यांच्या या विलक्षण विचारामुळे देशभर कौतुक केले जात आहे. हा मराठमोळा खासदार दुसरा-तिसरा कोणी नसून आपल्या आगळ्या-वेगळ्या कल्पकतेने परिचित असलेले अहिल्यानगरचे खासदार निलेश लंके (MP Nilesh Lanke) आहेत. विशेष म्हणजे या दौऱ्यामध्ये लंके यांच्या वडिलांचा देखील सहभाग आहे.

मिळालेल्या माहितीनुसार, १९ जुलै रोजी अहिल्यानगर येथून २०० शिक्षक रेल्वेने दिल्लीसाठी रवाना झाले. विशेष म्हणजे नीलेश लंके यांनी स्वतः या सर्व शिक्षकांबरोबर रेल्वेने प्रवास करत शिक्षकांची काळजी घेतली. दिल्लीमध्ये पोहोचल्यानंतर सर्वप्रथम शिक्षकांनी अक्षरधाम मंदिराला भेट दिली. दुसऱ्या दिवशी लाल किल्ल्याला भेट दिली. या ठिकाणी मुघलकालीन वास्तुकला, स्वातंत्र्य संग्रामाची पार्श्वभूमी आणि भारताच्या गौरवशाली इतिहासाची झलक अनुभवली. शाळेत आम्ही शिकविलेला इतिहास आज प्रत्यक्ष पाहण्याची संधी मिळाल्याच्या भावना याप्रसंगी शिक्षकांनी व्यक्त केल्या.

विद्यार्थ्यांना दिलासा! अभियंता भरती प्रक्रियेत मराठी विषय समाविष्ट

शिक्षकांच्या दौऱ्याचे सर्वांत मोठे आकर्षण म्हणजे भारतीय संसद भवनाला दिलेली भेट. संसदेच्या पावसाळी अधिवेशनाच्या पहिल्याच दिवशी शिक्षकांनी संसदेतील प्रत्यक्ष कामकाज अनुभवले. राज्यसभेच्या शांत सभागृहातील चर्चा, लोकसभेतील आंदोलन, प्रश्नोत्तरांची सत्रे, मंत्री आणि खासदारांची भाषणे या गोष्टी पाहून शिक्षक भावुक झाले. यावेळी शिक्षकांना विविध पक्षांचे खासदार, मंत्री आणि अधिकारी यांच्याशी थेट संवाद साधण्याची संधी मिळाली. खासदार नीलेश लंके यांनी शिक्षकांचा संसदेत औपचारिक परिचय करून दिला.
________________________________

संसदेच्या पावसाळी अधिवेशनाच्या पहिल्याच दिवशी, २०० पेक्षा अधिक निवृत्त शिक्षकांनी संसद भवनाला भेट दिली आणि संसदीय कामकाजाची साक्षात अनुभूती घेतली. या ऐतिहासिक क्षणी मी स्वतः शिक्षकांसोबत संसदेत उपस्थित राहिलो आणि त्यांच्यासोबत संसदेचे अनेक स्मरणीय छायाचित्र घेतले. या शिक्षकांनी केवळ देशाची लोकतांत्रिक प्रक्रियेची साक्षात अनुभूती घेतली नाही, तर संसदेच्या कार्यपद्धतीचा अभ्यास करून अनेक प्रश्नांची उत्तरे देखील मिळवली. "गर्व वाटतो, की हे आदरणीय गुरुजन संसदेचे दर्शन घेत आहेत, आणि मी त्यांच्यासोबत हे क्षण अनुभवत आहे!"

निलेश लंके, खासदार, अहिल्यानगर