बास्केटबॉल स्टँड डोक्यात कोसळून दहावीच्या विद्यार्थ्याचा मृत्यू, प्रशासनाविरोधात विद्यार्थी आक्रमक

एज्युवार्ता न्यूज नेटवर्क 

पुण्यातील लोणावळा परिसरातून अत्यंत दुःखद घटना समोर आली आहे. इंदुरी येथील तोलानी मॅरिटाइम इन्स्टिट्यूटच्या (Tolani Maritime Institute) मैदानावरील बास्केटबॉल स्टँड अचानक विद्यार्थ्याच्या डोक्यात कोसळल्याने (Basketball stand collapsed) त्याचा जागीच मृत्यू झाला आहे. विशाल वर्मा (वय १६ वर्षे) असे अपघातात मृत्यू (Student's Death) झालेल्या विद्यार्थ्याचे नाव आहे. अचानक घडलेल्या या अपघाती मृत्यूने परिसरात हळहळ व्यक्त होत आहे. 

मिळालेल्या माहितीनुसार, तोलानी मॅरिटाइम इन्स्टिट्यूटच्या आवारात उभारलेला बास्केटबॉल स्टँड अचानक कोसळून विशाल वर्मा याच्या डोक्यावर पडला. या घटनेत तो गंभीर जखमी झाला. धक्कादायक बाब म्हणजे, गंभीर जखमी अवस्थेत विशाल जवळपास तासभर घटनास्थळावर रक्ताच्या थारोळ्यात पडून होता, मात्र त्याला तातडीने कोणतीही मदत मिळाली नाही. तासाभराने त्याला तळेगाव येथील मायमर हॉस्पिटलमध्ये उपचारासाठी दाखल करण्यात आले. मात्र, उपचार सुरू होण्यापूर्वीच डॉक्टरांनी त्याला मृत घोषित केले.

या घटनेनंतर संस्थेच्या परिसरात संतापाचे वातावरण पसरले असून, विद्यार्थ्यांमध्ये सुरक्षेबाबत चिंता व्यक्त केली जात आहे. इन्स्टिट्यूटमधील सुरक्षेच्या उपाययोजनांवरही प्रश्नचिन्ह उपस्थित होत आहे. घटनेची माहिती मिळताच आंबी एमआयडीसी पोलीस घटनास्थळी दाखल झाले असून, पुढील तपास सुरू आहे. नेमकी घटना कशामुळे घडली याचा शोध पोलीस घेत आहेत.

या घटनेनंतर इन्स्टिट्यूटमधील विद्यार्थी कमालीचे आक्रमक झाले आहेत. शाळा प्रशासनाच्या विरोधात त्यांनी जोरदार निदर्शने केली. विद्यार्थ्यांनी संस्थेवर गंभीर आरोप केले आहेत. दरवर्षी ७ लाख रुपये देऊनही मेडिकल फॅसिलिटी मिळत नसल्याचा विद्यार्थांचा आरोप आहे.