PRN Unblock चा लाभ नेमका कोणाला ?  विद्यापीठाचे परिपत्रक प्रसिद्ध 

एज्युवार्ता न्यूज नेटवर्क 

सत्र पूर्तता संपल्यानंतर PRN क्रमांक ब्लॉक (PRN block)केलेल्या विद्यार्थ्यांना पुन्हा एक परीक्षेची संधी उपलब्ध करून देण्याचा निर्णय सावित्रीबाई फुले पुणे विद्यापीठाच्या (Savitribai Phule Pune University)विद्या परिषदेमध्ये नुकताच घेण्यात आला. मात्र, या निर्णयाचा लाभ नेमका कोणाला होणार याबाबत स्पष्टता नव्हती. परंतु, विद्यापीठाने या संदर्भातील परिपत्रक प्रसिद्ध केले असून बॅकलॉगचे विषय (Backlog subject)राहिलेल्या विद्यार्थ्यांना एका वर्षाची संधी देण्यात आली आहे. त्यातही केवळ अंतिम वर्ष (final year)आणि अंतिम पूर्व वर्षातील (Final pre-year)ज्या विद्यार्थ्यांचे बॅकलॉगचे विषय राहिले आहेत, अशाच विद्यार्थ्यांना हा निर्णय लागू असणार आहे, असे सावित्रीबाई फुले पुणे विद्यापीठातर्फे स्पष्ट करण्यात आले आहे. 

विद्यापीठ अनुदान आयोगाच्या नियमावलीनुसार विद्यार्थ्यांना ठराविक वर्षात पदवी अभ्यासक्रम पूर्ण करावा लागतो.परंतु,त्यात N+2+1 या निकषानुसार विद्यार्थ्यांना परीक्षेची संधी उपलब्ध करून देण्यात आली आहे. ज्या विद्यार्थ्यांचे बॅकलॉग राहिले असतील अशाच विद्यार्थ्यांना ही संधी उपलब्ध असेल. ही संधी नवीन किंवा पुनर्प्रवेशित अशा विद्यार्थ्यांना कोणत्याही परिस्थितीत देता येणार नाहीत. ही संधी फक्त शैक्षणिक वर्ष 2024- 25 मधील दोन्ही सत्रामध्ये परीक्षेत प्रविष्ट होण्यास लागू राहील. या नियमानुसार विद्यार्थ्यांना हिवाळी सत्र 2024 व उन्हाळी सत्र 2025 या परीक्षा विद्यार्थ्यांना देता येतील.

सर्व अभ्यासक्रमातील ज्या विद्यार्थ्यांनी अंतिम वर्षाचा अभ्यासक्रम पूर्ण करून परीक्षा दिलेले आहे, अशा अंतिम वर्षातील अंतर्गत सर्व परीक्षा व विद्यापीठ लेखी परीक्षेचा बॅकलॉग असलेल्या विद्यार्थ्यांना ही संधी उपलब्ध असेल. त्याचप्रमाणे ज्या विद्यार्थ्यांनी अंतिम वर्षाचा अभ्यासक्रम पूर्ण करून परीक्षा दिलेली आहे, अशा अंतिम पूर्व वर्षातील अंतर्गत सर्व परीक्षा व विद्यापीठ लेखी परीक्षेचा बॅकलॉग असलेल्या विद्यार्थ्यांना सुद्धा ही संधी उपलब्ध असेल. अंतिम वर्ष व अंतिम पूर्व वर्ष यासाठी उपलब्ध असणाऱ्या संधीचा लाभ ज्या विद्यार्थ्यांना होत नाही.अशा पात्र असलेल्या विद्यार्थ्यांना विशेष बाब म्हणून संधी मिळण्यासाठी संबंधित महाविद्यालयाकडे सर्व उपलब्ध व वैद्य कागदपत्रासह अर्ज सादर करावे लागतील,असे परिपत्रकात नमूद करण्यात आले आहे. 

विद्यार्थ्यांना नियमित सुरू असलेल्या अभ्यासक्रमाच्या पॅटर्ननुसार समकक्ष विषय विचारात घेऊन परीक्षेसाठी प्रविष्ट व्हावे लागेल. वार्षिक पॅटर्न प्रमाणे जुन्या  अभ्यासक्रमाच्या विद्यार्थ्यांनी सेमिस्टर पॅटर्ननुसार एका विषयास दोन समकक्ष विषय विचारात घेऊन परीक्षेसाठी प्रविष्ट व्हावे. ज्या विद्यार्थ्यांना परीक्षेसाठी विशेष संधी उपलब्ध करून दिली जात आहे, त्यांना पुढील काळात कोणत्याही प्रकारची संधी दिली जाणार नाही.

पीआरएन संदर्भात विद्यार्थ्यांना महाविद्यालयीन पातळीवर मार्गदर्शन व समुपदेशन करण्यासाठी सर्व उपाययोजना कराव्यात. तसेच याबाबत एकही विद्यार्थी परीक्षा विभागात पाठविण्यात येऊ नये, याची सर्वतोपरी काळजी घेण्यात यावी. तसेच दिलेल्या मुदतीत अर्ज न करणे, विद्यार्थ्यांपर्यंत माहिती न पोहोचणे, आदी कारणामुळे विद्यार्थी परीक्षेपासून वंचित राहू नये, याची सर्व जबाबदारी संबंधित महाविद्यालय व संस्थांची राहील. या संधीचा लाभ घेण्यापासून एकही विद्यार्थी वंचित राहणार नाही याबाबत दक्षता घ्यावी, असे आवाहन सावित्रीबाई फुले पुणे विद्यापीठाच्या परीक्षा व मूल्यमापन मंडळाचे संचालक डॉ.महेश काकडे यांनी केले आहे.

------------

PRN ब्लॉक झालेल्या बॅकलॉगच्या विद्यार्थ्यांचे परीक्षांचे परिपत्रक प्रसिध्द झाले आहे. विद्यार्थ्यांनी तत्काळ परीक्षा अर्ज भरावेत. विद्यापीठाने  येत्या ३० तारखेपर्यंत अर्ज जमा करण्यास मुदत दिली आहे. 
- सागर वैद्य, सदस्य, मॅनेजमेंट कौन्सिल, SPPU

-------------------

विद्यार्थी हिताचा विचार करून सावित्रीबाई फुले पुणे विद्यापीठाचे कुलगुरू डॉ. सुरेश गोसावी, प्र- कुलगुरू डॉ. पराग काळकर, परीक्षा व मूल्यमापन मंडळाचे संचालक डॉ. महेश काकडे यांनी सत्रपूर्तता संपलेल्या विद्यार्थ्यांना परीक्षेची आणखी एक संधी उपलब्ध करून दिली.विद्यार्थ्यांच्या कल्याणासाठी या प्रकारचा निर्णय घेणारे पुणे विद्यापीठ हे देशातील एकमेव विद्यापीठ आहे. 

-  डॉ.  ज्योत्स्ना एकबोटे, सदस्य, मॅनेजमेंट कौन्सिल, SPPU