SPPU : मंदिर व्यवस्थापन अभ्यासक्रमाचा मुद्दा तापला, शिक्षण क्षेत्रातून तीव्र नाराजी 

एज्युवार्ता न्यूज नेटवर्क 

सावित्रीबाई फुले पुणे विद्यापीठात (Savitribai Phule Pune University) मंदिर व्यवस्थापन या विषयात पदव्युत्तर पदविका अभ्यासक्रम (Temple Management Postgraduate Diploma Course) सुरू करण्यात येणार आहे. सहा महिने मुदतीच्या या अभ्यासक्रमातून व्यावसायिक पद्धतीने मंदिर व्यवस्थापनासाठीची कौशल्ये, मंदिर व्यवस्थापनाचे सामाजिक, आर्थिक आणि सांस्कृतिक पैलू या विषयीचे मार्गदर्शन करण्यात येणार आह. फेब्रुवारीपासून विद्यापीठाच्या नाशिक संकुलात, तर पुणे येथे जूनपासून या अभ्यासक्रमासाठी प्रवेश सुरू करण्यात येणार आहेत. विशिष्ट धर्माला समोर ठेवून अभ्यासक्रम राबविणे म्हणजे संविधानाच्या सर्वधर्मसमभाव आणि धर्मनिरपेक्षता या आशयाला छेद देणे होय, अशा शब्दांत विद्यापीठ प्रशासनाच्या निर्णयावर शैक्षणिक क्षेत्रातील (Discontent in the education sector) मान्यवरांनी टीकास्त्र सोडले आहे. 

सावित्रीबाई फुले पुणे विद्यापीठाने मंदिर व्यवस्थापन अभ्यासक्रमासाठी टेम्पल कनेक्ट या संस्थेशी सामंजस्य करार केला आहे. मात्र, धर्माचा प्रचार आणि प्रसार करण्याचे काम विद्यापीठाचे आहे का? त्यासाठी विविध धर्माच्या संस्था कार्यरत आहेत, असा अभ्यासक्रम विद्यापीठात शिकवून तरुणांना पूजापाठ करूनच नोकऱ्या मिळणार आहेत, असे सरकारला वाटते. हा अत्यंत हास्यास्पद आणि निंदनीय प्रकार आहे, अशी नाराजी व्यक्त करण्यात आली आहे. 

--------------------------

सावित्रीबाई फुले पुणे विद्यापीठाच्या या एकतर्फी निर्णयाचा आम्ही जाहीर निषेध करीत आहोत. 140 कोटी लोकसंख्या असणाऱ्या आपल्या भारत देशात 121 भाषा 270 बोलीभाषा 461 जमाती आणि अनेक धर्म आणि पंथ अस्तित्वात आहेत. असे असताना विशिष्ट एका समुदायाला डोळ्यासमोर ठेवून त्यांच्यासाठी एखादा अभ्यासक्रम सुरू करणे हे देशातील धर्मनिरपेक्ष असणाऱ्या संविधानाला हे अत्यंत घातक आहे.

दिलीपसिंग विश्वकर्मा, अध्यक्ष, महापेरेंट्स पालक संघटना