बदलापूर शाळा प्रशासनातील पदाधिकाऱ्यांना जामीन; मुलीची आई हायकोर्टात जाणार 

एज्युवार्ता न्यूज नेटवर्क 

काही दिवसांपुर्वी बदलापूर येथील शाळेत चिमुकल्या मुलींसोबत घडलेल्या लैंगिक अत्याचाराच्या घटनेने (Badlapur sexual assault incident) संपूर्ण देश हादरला होता. तेव्हापासून जवळपास दीड महिना पोलिंसाना चकवा देवून फरार असलेले शाळेचे अध्यक्ष आणि सचिव यांना दोनच दिवसांपुर्वी अटक करण्यात आली होती. त्यानंतर आता जिल्हा सत्र न्यायालयाने (District Sessions Court) अध्यक्ष उदय कोतवाल, सचिव तुषार आपटे आणि शाळेच्या मुख्याध्यापिका अर्चना आठवले यांचा जामीन मंजूर (Bail granted) केला . मात्र, त्याविरोधात मुलीची आई हायकोर्टात जाणार (The girl mother will go to the High Court) असल्याची माहिती समोर आली आहे. 

शाळेच्या संस्थाचालकांना जामीन देण्याच्या सत्र न्यायालयाच्या निर्णयाविरोधात पीडित मुलीची आई उच्च न्यायालयात दाद मागणार आहे. पोलीस प्रशासन या आरोपींना अटक करण्यात आणि न्यायालयात भक्कमपणे बाजू मांडण्यात कमी पडले, असा आरोप पीडित मुलीच्या आईने केला. संस्थाचालकांनी प्रकरण दडपण्याचा, पुरावे नष्ट करण्याचा प्रयत्न केल्यामुळे आम्हाला त्रास झाला, या गंभीर गुन्ह्यात संस्थाचालकांना सहज जामीन मिळतोच कसा, असा प्रश्न त्यांनी उपस्थित केला. आपल्या मुलीवर अत्याचार करणाऱ्या अक्षयला न्यायव्यवस्थेकडून योग्य शिक्षा होणे गरजेचे होते, असे मतही त्यांनी व्यक्त केले.

कोतवाल व आपटे दोन दिवस पोलिसांच्या ताब्यात होते. त्यांच्यावर लावलेल्या आरोपांबाबत चौकशी करण्यास तो कालावधी पुरेसा असल्याचे मत व्यक्त करीत न्यायालयाने सरकारी वकिलांची पाच दिवसांच्या पोलिस कोठडीची मागणी फेटाळून लावली. दोन दिवसांपूर्वी कोतवाल, आपटे या दोघांना कर्जतहून अटक केली. पोलिसांनी कोतवाल, आपटे व आठवले यांना न्यायालयासमोर हजर केले. न्यायालयाने या तिघांना जामीन मंजूर केला.