विद्यापीठाला मिळणार पहिल्या प्रभारी महिला कुलसचिव, डॉ.ज्योती भाकरे यांच्याकडे पदभार?

एज्युवार्ता न्यूज नेटवर्क 

सावित्रीबाई फुले पुणे विद्यापीठ (Savitribai Phule Pune University)आपले अमृत महोत्सवी वर्ष साजरे करत असून नुकताच विद्यापीठाचा नामविस्तार दिन समारंभ पार पडला. क्रांतीज्योती सावित्रीबाई फुले यांचे नाव देण्यात आलेल्या पुणे विद्यापीठाच्या आत्तापर्यंतच्या कुलसचिव (Register)पदाच्या परंपरेत पहिल्या महिला कुलसचिव म्हणून विराजमान होण्याचा मान डॉ.ज्योती भाकरे (Dr.Jyoti bhakre) यांना मिळणार आहे. येत्या सोमवारी प्रभारी कुलसचिव डॉ.विजय खरे (Dr.Vijay Khare) यांच्याकडून डॉ.ज्योती भाकरे या प्रभारी कुलसचिव पदाची सूत्रे हाती घेणार आहेत, असे विश्वसनीय सूत्रांनी सांगितले. मात्र, सोमवारी सकाळी 11 वाजता या संदर्भातील चित्र स्पष्ट होणार आहे.

सावित्रीबाई फुले पुणे विद्यापीठाला आत्तापर्यंत 18 पूर्ण वेळ कुलसचिव मिळाले. तर 15 प्रभारी कुलसचिव लाभले. 1992 ते 1994 या कालावधीमध्ये विद्यापीठाला पहिले म.दा.नलावडे हे प्रभारी कुलसचिव मिळाले.म.दा. नलावडे यांच्यानंतर मु.गो. दाखवले, अ. दि.अडसूळ, मा.गो. शिंदे, कारभारी सोनवणे, विनायक पोळ, डॉ.पी.बी. विद्यासागर, मा.शा. फिरंगे, डॉ.बी.बी चौगुले, डॉ.संजीव सोनवणे, कॅप्टन डॉ.चंद्रशेखर चितळे, डॉ.दिलीप ढवळे , डॉ.अरविंद शाळीग्राम, डॉ .प्रफुल्ल पवार आणि डॉ. विजय खरे यांच्यानंतर विद्यापीठातील विधी विभागाच्या प्राध्यापिका डॉ. ज्योती भाकरे यांच्याकडे प्रभारी कुलसचिव पदाची जबाबदारी सोपवली जाणार आहे.

विद्यापीठाचे माजी कुलसचिव डॉ. प्रफुल्ल पवार यांचा कार्यकाल संपल्यानंतर डॉ.विजय खरे यांच्याकडे प्रभारी कुलसचिव पदाची जबाबदारी देण्यात आली होती. त्यानंतर पूर्णवेळ कुलसचिव पदाच्या नियुक्तीसाठी जाहिरात प्रसिद्ध करून मुलाखतीची प्रक्रिया राबविण्यात आली होती. परंतु,पूर्ण वेळ कुलसचिव पदावर नियुक्ती होण्यापूर्वीच संभाव्य उमेदवाराचे नाव चर्चेत आले आणि त्यावरून मोठा वादंग निर्माण झाला. संभाव्य उमेदवार कुलसचिव म्हणून नियुक्त न होऊ शकल्याने अनेकांची मने दुखावली गेली. त्यामुळे विद्यापीठात येऊ घातलेल्या प्रस्तावित कन्व्हेन्शन सेंटरला विरोध झाला. त्यातच आता विद्यापीठाच्या प्रभारी कुलसचिव पदी कार्यरत असलेल्या डॉ. विजय खरे यांच्याकडून प्रभारी कुलसचिव पदाचा भार डॉ. ज्योती भाकरे यांच्याकडे सोपवला जाणार आहे. त्यामुळे विद्यापीठात वेगळ्याच पद्धतीचे राजकारण सुरू असल्याची चर्चा विश्वसनीय सूत्रांनी व्यक्त केले आहे.

--------------

दरम्यान, ज्योती भाकरे या प्रभारी कुलसचिव म्हणून नियुक्त होणार असल्या तरी विद्यापीठाला यापूर्वी पूर्णवेळ महिला कुलसचिव लाभल्या आहेत. 23- 6 -89 ते 3-6-90 या कालावधीत शोभना पाटील या विद्यापीठाला पूर्ण वेळ कुलसचिव म्हणून लाभल्या आहेत. त्यामुळे ज्योती भाकरे या केवळ पहिल्या प्रभारी महिला कुलसचिव असतील.