बोगस भरतीने घेतला जीव; चिठ्ठी लिहून शिक्षकाने केली आत्महत्या

एज्युवार्ता न्यूज नेटवर्क

बीडच्या केज मधील विनाअनुदानित आश्रमशाळेतील शिक्षक धनंजय नागरगोजे (Dhananjay Nagargoje) यांनी संस्थाचालकाच्या जाचाला कंटाळून आत्महत्या केल्याची घटना ताजी असतानाच आता मराठवाड्यातून आणखी एक धक्कादायक बातमी समोर आली आहे. परभणी जिल्ह्यातील आडगाव दराडे येथील एका शिक्षकाने संस्थाचालकाच्या जाचाला कंटाळून (Suicide due to harassment by directors) गळफास घेऊन आपली जीवन यात्रा संपवली आहे. आपले आयुष्य संपवण्यापूर्वी शिक्षकाने एक भावनिक चिठ्ठी लिहून संस्थाचालकाच्या आर्थिक पिळवणुकीचा पाढाच वाचला आहे. गळफास घेऊन मृत्यू पावलेल्या शिक्षकाचे नाव सोपान पावले (Sopan Pawale)  (वय 35 वर्ष) असून ते नरसिंह प्राथमिक शाळेत प्राथमिक शिक्षक या पदावर कार्यरत होते. 

परभणी जिल्ह्यातील मंगरूळ येथे नरसिंह प्राथमिक विद्यालय आहे. या विद्यालयात प्राथमिक शिक्षक या पदावर सोपान शिवराम पालवे हे कार्यरत होते पालवे हे मूळ परभणीच्या सेलू तालुक्यातील आडगाव दराडे येथील मूळ रहिवासी आहेत. ते शिक्षक म्हणून ज्या नरसिंह प्राथमिक विद्यालयात कार्यरत होते. नोकरीला लागताना दराडे यांनी आपली शेतजमीन विकून वीस लाख रुपयांचे डोनेशन संस्थेच्या सचिवांना दिले होते. हे पैसे त्या संस्थेचे सचिव बळवंत खळीकर यांनी सातत्याने त्यांचा छळ सुरू केला होता, असे मृत शिक्षकाने सुसाईट नोटमध्ये म्हटले आहे. 

त्या संस्थेला 20 टक्के अनुदान आल्यानंतर सचिवांनी पाच लाख रुपयांची मागणी केली होती. पाच लाख रुपये संस्थेला देऊनही 20 टक्के प्रमाणे वेळेवर पगार देखील मिळत नव्हता. तर, दुसरीकडे संस्थेच्या पदाधिकाऱ्यांकडून पालवे यांचा छळ करण्यात येत होता. संस्थेच्या सचिवाच्या आणि पदाधिकाऱ्यांच्या त्रासाला कंटाळून परभणी तालुक्यातील आरपी रुग्णालयाच्या शेजारी असलेल्या लिंबाच्या झाडाला गळफास लावून सोपान पालवे यांनी आपले आयुष्य संपवले. जीव देण्यापूर्वी त्यांनी यासाठी कारणीभूत असलेले संस्थेचे सचिव बळवंत खळीकर आणि अन्य पदाधिकाऱ्यांची नावे लिहिली आहेत. 

__________________________________________________

अशा मुजोर संस्थाचलाकांवर कडक कारवाई होणे आवश्यक आहे. अशा काही संस्थाचालकांमुळे इतर चांगल्या संस्थाचलकांना त्रास होत आहे. त्यासंदर्भात आम्ही परभणी जिल्हाधिकाऱ्यांना निवेदन दिले आहे. यासंदर्भात सदर संस्थाचालक व सचिव यांच्यावर गुन्हे दाखल करण्यात आले आहेत. योग्य कारवाई नाही झाल्यास आंदोलन करण्यात येईल.

- खंडेराव जगदाळे, उपाध्यक्ष महाराष्ट्र राज्य विना अनुदानित शाळा कृती समिती