SPPU : तरुणाचे लज्जास्पद कृत्य, विद्यार्थिनीचा कारवाईसाठी संघर्ष  

एज्युवार्ता न्यूज नेटवर्क 

सावित्रीबाई फुले पुणे विद्यापीठातील (Savitribai Phule Pune University) एका विभागात शिक्षण घेणाऱ्या विद्यार्थिनी समोर एका तरुणाने लज्जास्पद कृत्य (young man's shameful act) केल्याची धक्कादायक माहिती समोर आली आहे. या प्रकरणी संबंधित तरुणावर कडक कारवाई करावी, (Action should be taken), अशी मागणी पीडित विद्यार्थिनीने केली. मात्र, विद्यापीठ प्रशासनाने कोणत्याही प्रकारची कारवाई केली नाही. परिणामी विद्यार्थिनीने विद्यापीठाच्या विभागासमोर ठिय्या आंदोलन केले. दरम्यान, विद्यार्थिनीच्या संघर्षानंतर संबंधित तरुणाविरोधात विद्यापीठाच्या सुरक्षा विभागाकडून (University Security Department) पोलिसात तक्रार देण्याची प्रक्रिया सुरू असल्याची माहिती सूत्रांनी दिली आहे.

पुणे विद्यापीठात गेल्या काही दिवसांपासून विद्यार्थिनींची छेडछाड केल्याच्या घटना सातत्याने समोर येताना दिसत आहेत. त्यातच आता विद्यार्थिनी समोर एका तरूणाने अश्लील वर्तन केल्याची घटना समोर आली. मागील आठवड्यात विद्यापीठातील एक विभागात प्रवेश घेतलेल्या पोलीस कर्मचारी असलेल्या विद्यार्थ्याने एका विद्यार्थिनीची छेड काढण्याची घटना घडली होती. काही कारणास्तव या विद्यार्थिनीने पोलिसात तक्रार देण्यास नकार दिला. पोलिसांनी संबंधित पोलीस कर्मचारी असलेल्या विद्यार्थ्याला समज देऊन प्रकरणावर पडदा टाकला. त्यानंतर आवघ्या काही दिवसांत घडलेल्या या अश्लील वर्तन प्रकरणामुळे विद्यापीठात शिक्षण घेणाऱ्या विद्यार्थिनींच्या सुरक्षिततेचा प्रश्न पुन्हा एकदा ऐरणीवर आला आहे. 

सावित्रीबाई फुले पुणे विद्यापीठात १ हजार २३६ सीसीटीव्ही कॅमेरे आहेत. त्यातील शंभरहून अधिक सीसीटीव्ही कॅमेरे बंद अवस्थेत असल्याचे  नुकतेच अधिसभेत समोर आले. बंद पडलेले सीसीटीव्ही कॅमेरे तात्काळ दुरूस्त करून चालू करावेत,  अशी मागणी अधिसभा सदस्यांनी विद्यापीठ प्रशासनाकडे केली होती. आता विद्यार्थिनी समोर अश्लील वर्तन करणारा तरुण सीसीटीव्ही कॅमेऱ्याच्या माध्यमातून शोधण्याचा प्रयत्न केला जात आहे. परंतु, त्यात विद्यार्थ्यांचा चेहरा स्पष्ट दिसून येत नसल्याचे देखील सूत्रांकडून सांगितले जात आहे. त्यामुळे संबंधित विद्यार्थ्याला कसे शोधणार? आणि त्याच्यावर कारवाई कशी होणार? असा मोठा प्रश्न विद्यार्थी आणि पालकांना पडला आहे.