सामाजिक न्यायमंत्री यांच्याकडून आश्रमशाळा, वसतीगृहांची झाडाझडती

एज्युवार्ता न्यूज नेटवर्क 

राज्याचे सामाजिक न्याय मंत्री म्हणून वर्णी लागल्यानंतर संजय शिरसाट (Sanjay Shirsat) चांगलेच अॅक्शन मोडवर आले आहेत. नुकतीच त्यांनी राज्यातील काही अनुसूचित जातींच्या विद्यार्थ्यांच्या (Scheduled Caste students) आश्रमशाळा आणि वसतिगृहाची पाहाणी केली. त्यावेळी शिरसाट म्हणाले, आश्रमशाळा आणि  वसतिगृहांतील सोय सुविधांसाठी (Ashram school and hostel facilities) विशेष प्रयत्न करणार असून त्यासाठी पुढील आठवड्यात बैठक घेण्यात येणार आहे. 

मंत्री शिरसाट यांनी  मुंबईतील सामाजिक न्याय विभागाअंतर्गत सुरू असलेल्या संत मीराबाई मुलींचे शासकीय वसतिगृह वरळी 116, डॉ. बाबासाहेब आंबेडकर मुलांचे शासकीय वसतिगृह वरळी 116,  मागासवर्गीय मुलांचे शासकीय वसतिगृह वरळी 118 या वसतिगृहांना भेटी देऊन विद्यार्थ्यांशी संवाद साधला.

सामाजिक न्याय विभागाच्या वसतिगृहात असलेल्या विद्यार्थ्यांना देण्यात येणाऱ्या सोयी-सुविधांमध्ये  सुधारणा करुन विद्यार्थ्यांना अधिक चांगल्या पद्धतीने शिक्षण घेता याव्यात, यासाठी सामाजिक न्याय विभागामार्फत विशेष प्रयत्न केले जातील, असा विश्वास यावेळी संजय शिरसाट यांनी व्यक्त केला.

अनुसूचित जाती आश्रमशाळांतील शिक्षक व कर्मचारी मागील २५ वर्षांपासून आंदोलने करीत आहेत. त्यांना न्याय देण्यासाठी पुढील आठवड्यात सामाजिक न्याय विभागाच्या सचिवांसोबत बैठक घेण्यात येईल, असे आश्वासन सामाजिक न्यायमंत्री संजय शिरसाट यांनी दिले आहे.