'फर्ग्युसन' महाविद्यालयामध्ये सावरकरांना जयंतीनिमित्त अभिवादन 

एज्युवार्ता न्यूज नेटवर्क 

स्वातंत्र्यवीर विनायक दामोदर सावरकर यांच्या जयंतीनिमित्त (Swatantravir Savarkar's birth anniversary) फर्ग्युसन महाविद्यालयात (Ferguson College) त्यांच्या प्रतिमेस पुष्पहार अर्पण करून त्यांना अभिवादन करण्यात आले. जयंतीनिमित्त सावरकरांच्या क्रांतिकारी कार्याची साक्ष असलेली  महाविद्यालयातील ऐतिहासिक खोली क्रमांक 17 नागरिकांसाठी आज खुली (Historic Room No. 17 opens to the public today) ठेवण्यात आली, असल्याची माहिती महाविद्यालय प्रशासनाकडून देण्यात आली. 

विद्यार्थी असताना 1902 ते 1905 या कालावधीत सावरकर यांचे वास्तव्य या खोलीत होते. या खोलीतूनच ‘अभिनव भारत’ सारख्या संघटनेची पायाभरणी, स्वदेशी चळवळीची सुरुवात, विदेशी वस्त्रांची होळी यांसारख्या क्रांतिकारी उपक्रमांची आखणी करण्यात आली होती. तसेच इथेच त्यांनी ‘सिंहगडाचा पोवाडा’, ‘बाजीप्रभू देशपांडे’ यांसारखी राष्ट्रप्रेरक काव्यरचना केली असल्याचा माहितीचा उजाळा देण्यात आला. 

या खोलीत सावरकरांचा अर्धपुतळा, डी.लिट. पदवीचे गणवेश, वैयक्तिक वस्तू आणि दुर्मीळ छायाचित्रांचे संग्रह पाहायला मिळतो. ही खोली आजही अनेकांना देशभक्तीची प्रेरणा देणारे ठिकाण म्हणून ओळखली जाते. 1905 साली विदेशी वस्त्रांची होळी प्रकरणामुळे त्यावेळचे प्राचार्य रँग्लर परांजपे यांनी सावरकरांना  वसतिगृहातून वगळले होते, त्यावर लोकमान्य टिळकांनी 'केसरी'मधून जोरदार निषेध केला होता. 

डेक्कन एज्युकेशन सोसायटीने या खोलीचे जतन केले असून दरवर्षी सावरकर यांच्या जयंती आणि पुण्यतिथीला ही खोली सर्वांसाठी खुली केली जाते, महाविद्यालयाकडून देण्यात आली आहे. या कार्यक्रमात डेक्कन एज्युकेशन सोसायटीचे उपाध्यक्ष ऍड. अशोक पलांडे, कार्यवाह डॉ. आनंद काटिकर यांच्यासह फर्ग्युसन महाविद्यालयाचे प्राचार्य श्याम मुंडे आणि आदी मान्यवर उपस्थित होते.