ISRO चा "सर्वोत्कृष्ट समन्वयक पुरस्कार" डॉ. नितीन मुंढे यांना प्रदान
डॉ. नितीन मुंढे २०१५ पासून एस. पी. कॉलेज, पुणे येथे IIRS-ISRO दूरस्थ शिक्षण केंद्राचे यशस्वी संचालन करत आहेत. या कालावधीत १५५ हून अधिक IIRS-ISRO दूरस्थ अभ्यासक्रम राबवून त्यांनी हजारो विद्यार्थ्यांना GIS, रिमोट सेन्सिंग (RS), जागतिक स्थान निश्चिती प्रणाली (GPS) आणि अंतराळ तंत्रज्ञान यांसारख्या अत्याधुनिक विषयांमध्ये प्रशिक्षण दिले आहे.
eduvarta@gmail.com 
एज्युवार्ता न्यूज नेटवर्क
भारतीय अंतराळ संशोधन संस्था (ISRO) अंतर्गत भारतीय रिमोट सेन्सिंग संस्था (IIRS), डेहराडून यांच्या वतीने दिला जाणारा प्रतिष्ठित "सर्वोत्कृष्ट समन्वयक पुरस्कार" (Best Coordinator Award) यंदा एस.पी.कॉलेज, पुणेच्या IIRS-ISRO दूरस्थ शिक्षण केंद्राचे समन्वयक प्रा. डॉ. नितीन नथुराम मुंढे (Coordinator of IIRS-ISRO Distance Learning Centre, S.P. College, Pune Prof. Dr. Nitin Nathuram Mundhe) यांना प्रदान करण्यात आला. डेहराडून येथे पार पडलेल्या समारंभात ISRO चे माजी अध्यक्ष आणि अंतराळ आयोगाचे सदस्य पद्मश्री ए.एस.किरण कुमार यांच्या हस्ते हा पुरस्कार प्रदान करण्यात आला.
या प्रसंगी IIRSचे संचालक डॉ.आर.पी. सिंग, ISRO अंतराळ विज्ञान कार्यक्रमाचे संचालक डॉ. तीर्थ दास, IIRSच्या समूह निदेशक डॉ. शेफाली अग्रवाल, डीन (शैक्षणिक) डॉ. प्रमोद कुमार यांच्यासह देशभरातील नामवंत वैज्ञानिक आणि संशोधक उपस्थित होते.
डॉ. नितीन मुंढे २०१५ पासून एस. पी. कॉलेज, पुणे येथे IIRS-ISRO दूरस्थ शिक्षण केंद्राचे यशस्वी संचालन करत आहेत. या कालावधीत १५५ हून अधिक IIRS-ISRO दूरस्थ अभ्यासक्रम राबवून त्यांनी हजारो विद्यार्थ्यांना GIS, रिमोट सेन्सिंग (RS), जागतिक स्थान निश्चिती प्रणाली (GPS) आणि अंतराळ तंत्रज्ञान यांसारख्या अत्याधुनिक विषयांमध्ये प्रशिक्षण दिले आहे. त्यांनी व्याख्याने, चर्चासत्रे, कार्यशाळा तसेच हँड्स-ऑन ट्रेनिंगद्वारे तांत्रिक ज्ञान प्रसारित करण्यासाठी भरीव योगदान दिले आहे. त्यांच्या या उल्लेखनीय कार्याची दखल घेत ISROने भारतातील ३८०० दूरस्थ शिक्षण केंद्रांमधून एस. पी. कॉलेज, पुणे यांना प्रथम क्रमांकाचा बहुमान दिला आहे.
या पुरस्काराबद्दल महाविद्यालयाचे प्र. प्राचार्य प्रा.डॉ. सुनील गायकवाड यांनी डॉ. मुंढे यांचे अभिनंदन करत "हा पुरस्कार महाविद्यालयाच्या शैक्षणिक क्षेत्रातील भरीव योगदानाची पावती असून, भविष्यात संशोधन आणि नवीन तंत्रज्ञानाच्या अभ्यासाला आणखी चालना मिळेल," असे मत व्यक्त केले.
डॉ. मुंढे यांनी आपल्या यशाचे श्रेय प्र. प्राचार्य प्रा. डॉ. सुनील गायकवाड, NEP चे समन्वयक डॉ. संज्योत आपटे, उपप्राचार्य वाणिज्य शाखा डॉ. प्रवीण रणसुरे, उपप्राचार्या कला शाखा डॉ. विद्या अवचट, उपप्राचार्या विज्ञान शाखा डॉ. सुनीता जाधव, IQAC समन्वयक डॉ. मनोजकुमार देवणे, सर्व सहकारी प्राध्यापक तसेच विद्यार्थ्यांच्या सहकार्याला दिले आहे.
शिक्षण प्रसारक मंडळीचे अध्यक्ष अॅड. एस. के. जैन आणि एस. पी. कॉलेजचे अध्यक्ष अशोक वझे यांनी या यशाबद्दल संपूर्ण महाविद्यालय परिवाराचे अभिनंदन केले असून, हा पुरस्कार एस. पी. कॉलेजच्या शैक्षणिक आणि संशोधन क्षेत्रातील वर्चस्वाचा ठळक दाखला आहे, असे गौरवोद्गार काढले.
हा पुरस्कार फक्त व्यक्तीगत सन्मान नसून, संपूर्ण संस्थेसाठी अभिमानाची गोष्ट आहे. भविष्यात आणखी संशोधन आणि नाविन्यपूर्ण उपक्रम राबवण्यासाठी हा पुरस्कार प्रेरणादायी ठरेल, असा विश्वास डॉ. नितीन मुंढे यांनी व्यक्त केला.
