प्रजासत्ताक दिनी शाळांमध्ये संविधानाचे वाचन करणे बंधनकारक; शिक्षणमंत्री दादा भुसे 

एज्युवार्ता न्यूज नेटवर्क 

राज्यातील सर्व शाळांमध्ये २६ जानेवारी (प्रजासत्ताक दिनी) संविधानाचे वाचण करणे बंधनकारक (Reading the Constitution is mandatory) करण्यात आले आहे, अशा माहिती राज्याचे शालेय शिक्षणमंत्री दादा भुसे (School Education Minister Dada Bhuse) यांनी मंत्रिमंडळ बैठकीनंतर माध्यमांना दिली. या निर्णयाची अंमलबजावणी करण्यासाठी राज्यातील सर्व शाळांना लवकरच आदेश जारी केले जाणार आहेत. 

प्रजासत्ताक दिनापासून राज्यातील सर्व शाळांमध्ये उपक्रम राबवण्याचा आदेश यापूर्वीच देण्यात आला आहे. त्यात ध्वजावंदनानंतर प्रभात फेरी, भाषण स्पर्धा, नृत्य, खेळ असे उपक्रम राबवून प्रजासत्ताक दिनी साजरा करण्याच्या सूचना देण्यात आल्या आहेत. त्यानंतर आता यामध्ये संविधान वाचनाची जोड मिळाली आहे. 

संविधान वाचन करण्याबाबत लवकरच शासन निर्णय प्रसिद्ध करण्यात येणार आहे. त्यामुळे राज्यातील सर्व व्यवस्थापनाच्या शाळांना २६ जानेवारी रोजी संविधान वाचन करावे लागणार आहे. प्रत्येक प्रजासत्ताक दिनी शाळांमध्ये वेगवेगळे सांस्कृतिक कार्यक्रम आयोजित केले जातात. या कार्यक्रमांसोबतच राज्यभरातील सर्व शाळांना राज्यघटनेच्या प्रास्ताविकेचे वाचन बंधनकारक केले जाईल, असे शिक्षणमंत्री दादा भुसे यांनी सांगितले.

शाळांमध्ये खालील उपक्रम राबवले जाणार

राज्यातील सर्व माध्यमांच्या शासकीय व खासगी व्यवस्थापनाच्या सर्व शाळांमध्ये ध्वजवंदनानंतर विद्यार्थ्यांनी राष्ट्रगीत गायन, राज्यगीत गायन, देशभक्तिपर गीत गायन करावे. शाळेच्या परिसरात प्रभात फेरी काढणे. विद्यार्थ्यांकरिता स्वातंत्र्यसैनिक, देशभक्ती, लोकशाही अशा विषयांवर भाषण स्पर्धा आयोजित करणे. विद्यार्थ्यांनी स्वतः लिहिलेल्या किंवा इतर कवींच्या देशभक्तिपर कवितांचे वाचन करावे. विद्यार्थ्यांकरिता देशभक्तिपर गाण्यांवर नृत्य स्पर्धा, देशभक्तिपर विषयांवर चित्रकला, निबंध स्पर्धा आयोजित करणे. विद्यार्थ्यांसाठी विविध प्रकारचे खेळ आयोजित करणे. विद्यार्थ्यांनी तयार केलेल्या हस्तकला, चित्रकला इत्यादी कलांचे प्रदर्शन आयोजित करावे, याबाबत यापुर्वीच शासन निर्णय प्रसिद्ध करण्यात आला आहे.