रॅगिंगचे लोन आता शाळेपर्यंत, मित्राकडूनच लुटले हजारो रुपये 

एज्युवार्ता न्यूज नेटवर्क 

मागील काही वर्षापासून विद्यापीठ, महाविद्यालयांमध्ये रॅगिंग केल्याच्या घटना ऐकायला, वाचायला मिळायच्या मात्र आता याचे लोन शाळांपर्यंत (Ragging in school) येऊन पोहोचले आहे. कोल्हापूर जिल्ह्यात (Kolhapur district crime news) एका शाळेत रॅगिंग केल्याचा धक्कादायक प्रकार समोर आला आहे. क्रशर चौकातील एका नामांकित शाळेत नववीच्या वर्गात शिकणाऱ्या सहा मुलांनी वर्गातीलच आपल्याच एका मित्राचे रॅगिंग करून त्याच्याकडून वेळोवेळी सुमारे हजारो रुपये लुटल्याचे समोर आले आहे. हा प्रकार गेल्या तीन-चार महिन्यांपासून सतत घडत आला आहे. मित्रांच्या दबावातून घाबरलेल्या मुलाने घरातील दागिन्यांची चोरी केल्यानंतर हा प्रकार उघडकीस आला. 

व्यवसायाच्या  निमित्ताने एक कुटुंब कोल्हापूर येथे राहायला आले आहे. त्यांचा मुलगा क्रशर चौकातील एका शाळेत नववीच्या वर्गात शिक्षण घेत आहे. घरची परिस्थिती बरी असल्याने त्याच्याकडे नेहमी थोडेफार पैसे असायचे. याच गोष्टीचा फायदा घेऊन वर्गातील काही मित्रांनी त्याची रॅगिंग करायचे ठरवले. सुरुवातीला गोड बोलून त्याच्याकडून पैसे लुटले. नंतर त्याला भीती घालून आणि धमकावून पैसे काढण्यास सुरुवात झाली. कधी शिक्षकांची, तर कधी शाळेतील वरच्या वर्गातील विद्यार्थ्यांची भीती घातली जात होती. भीतीपोटी मुलगा मित्र सांगतिल तसे करत होता.  

वेळोवेळी मिळालेल्या पैशातून मुलांनी पिझ्झा, बर्गर, कोल्ड्रिंक आणि फास्ट फूडवर पैशाची उधळन केली. विशेष म्हणजे यातील बहुतांश मुले बऱ्या घरची आहेत. त्यांना कुठलेही व्यसन नाही. अभ्यासात बरी आहेत. त्यांनी ब्लॅकमेलिंग करून पैसे उकळल्याचे पालकांना सुरुवातीला पटले नाही. अखेर मुलांनी कबुली दिल्यानंतर सर्वांनाच आश्चर्याचा  धक्का बसला. नववीतील मुलांनी मित्रालाच धमकावून पैसे उकळल्याने शिक्षक, पालक आणि पोलिसही चक्रावून गेले आहेत. हा गंभीर प्रकार उघडकीस येताच शाळेतील शिक्षकांनी सर्व मुलांना समज देऊन आठ दिवसांसाठी शाळेत न येण्याची शिक्षा केली. पालकांना बोलवून हा प्रकार परस्पर मिटविण्याचा सल्ला दिला.