उर्दू शाळेत शिक्षिकेसोबक धक्कादायक कृत्य; राज्यातील २२ शाळांचा अल्पसंख्यांक दर्जा काढण्याचे आदेश

एज्युवार्ता न्यूज नेटवर्क 

महाराष्ट्र राज्य अल्पसंख्यांक आयोगाचे (Maharashtra State Minorities Commission) अध्यक्ष प्यारे जिया खान (President Pyare Zia Khan) यांनी अकोला जिल्ह्यातील शासन अनुदानित उर्दू शाळांना भेटी दिल्या. त्यानंतर पातूर येथील उर्दू शाळेतील (Patur Urdu School) महिला शिक्षकांचा लैंगिक छळ (Sexual harassment of female teachers) व गैरकारभार प्रकरणी शाळा संचालकावर कठोर कारवाईचे आदेश देण्यात आले आहेत. तसेच  22 शाळांचा अल्पसंख्यांक दर्जा काढून घेण्याचे निर्देशही (Instructions to withdraw minority status of 22 schools) अध्यक्ष प्यारे जिया खान यांनी दिले आहेत. 

या भेटीदरम्यान अनेक धक्कादायक बाबी समोर आल्या आहेत. अकोला जिल्ह्यातील पातुर येथे अलहाज सलीम जकरिया उर्दू वरिष्ठ प्राथमिक शाळेच्या संचालकाकडून महिला शिक्षकांना मारहाण व लैंगिक छळाच्या तक्रारी अल्पसंख्यांक आयोगाला प्राप्त झाल्या होत्या. या पार्श्वभूमीवर प्यारे खान यांनी या शाळांना भेटी देत वस्तुस्थिती जाणून घेतली. पिडित महिला शिक्षकांनी प्यारे खान यांच्यासमोर शाळेचे संचालक सैय्यद कमरुद्दीन यांच्याविरोधात तक्रारींचा पाढा वाचला. 

शाळा संचालक सैय्यद कमरुद्दीन हे बंदुकीचा धाक दाखवून लैंगिक शोषण करत असल्याचा खळबळजनक आरोप यावेळी महिला शिक्षिकांनी केला. यावेळी त्यांनी प्यारे खान यांच्यासमोर पुरावे सादर केले. शिक्षकांची नेमणूक करण्यासाठी 40 लाख रुपये रोख मागणे, नियुक्त झालेल्या शिक्षकांच्या पगारातून 30 ते 40 टक्के रक्कम जबरदस्तीने वसूल करणे, अशा प्रकारच्या अनेक तक्रारी यावेळी शिक्षकांनी केल्या. सेवानिवृत्त झालेल्या शिक्षकांच्या सेवानिवृत्ती वेतनातूनही जबरदस्ती मोठी रक्कम वसूल केली जात असल्याच्या तक्रारी यावेळी अनेक सेवानिवृत्त शिक्षकांनी केल्या आहेत.

या सर्व प्रकरणानंतर शाळा संचालक कमरुद्दीन यांच्या विरोधात विविध 45 गंभीर गुन्हांची नोंद करण्यात आली. यात कलम 376 (बलात्कार) अशा स्वरुपाचे गंभीर गुन्हे देखील आहेत. शिवाय याच्याविरुद्ध हद्दपारची कारवाई करण्यात आली आहे. त्यामुळे मकोका व एमपीडीए अंतर्गत कारवाई करण्यासाठी मुख्यमंत्री देवेंद्र फडणवीस  यांना विनंती करणार असल्याचे प्यारे खान यांनी सांगितले.