मुक्त विद्यापीठाच्या उन्हाळी परीक्षा 'या' तारखेपासून सुरू, ४ लाख विद्यार्थी देणार परीक्षा

एज्युवार्ता न्यूज नेटवर्क 

यशवंतराव चव्हाण महाराष्ट्र मुक्त विद्यापीठाच्या (Yashwantrao Chavan Maharashtra Open University) विविध विद्याशाखांच्या ११२ अभ्यासक्रमांच्या परीक्षेच्या (Examinations for 112 courses of faculties) येत्या २७ मे पासून सुरू (Exams start from May 27) होणार आहेत. या परीक्षांचे आयोजन २७ मे ते १७ जून या कालावधीत करण्यात आले आहे. विद्यार्थ्यांची ही लेखी परिक्षा राज्यभरातील ५८० परीक्षा केंद्रांवर होईल. त्यासाठी जवळपास ४ लाख २५ हजार २०८ विद्यार्थी परीक्षेत सहभागी (4 lakh 25 thousand 208 students participated in the exam) होणार आहेत.

मुक्त विद्यापीठात शिक्षण घेणारे विद्यार्थी नोकरदार, व्यावसायिक, पोलीस, सैनिक, गृहिणी, शिक्षक, कामगार यासह इतर विविध घटकातील असतात. या परीक्षा सुरळीत होण्यासाठी विद्यापीठामार्फत विविध भरारी पथकांची नियुक्ती करण्यात आली आहे. परीक्षा आयोजनाच्या सर्व मार्गदर्शन सूचना विभागीय केंद्रांमार्फत परीक्षा केंद्रांना देण्यात आलेल्या असून विद्यार्थ्यांसाठी मदत यंत्रणाही कार्यरत करण्यात आलेली आहे. विद्यापीठाच्या ycmou.digitaluniversity.ac या पोर्टलवरील Examination या मेनू मध्ये मे २०२५ परीक्षेची संपूर्ण माहिती उपलब्ध करण्यात आलेली आहे. या संकेतस्थळाला विद्यार्थ्यांनी अद्ययावत माहितीकरिता वेळोवेळी भेट देण्याचे आवाहन विद्यापीठ प्रशासनाकडून करण्यात आले आहे. 

महाराष्ट्र लोकसेवा आयोगाकडून गट 'क' साठी १ जून  रोजी  परीक्षा घेण्याचे नियोजन आहे. त्याचा विचार करून मुक्त विद्यापीठाने १ जून रोजीची परीक्षा पुढे ढकलण्यात आली आहे. त्याचे सुधारित वेळापत्रक संबंधित परीक्षा केंद्रांना व विद्यार्थ्यांना कळविण्यात आले आहे. विद्यार्थ्याच्या परीक्षा प्रवेशपत्रावर (हॉल तिकीट) परिपत्रकानुसार सुधारित तारखेची नोंद करून प्रवेश पत्र उपलब्ध करून दिले आहे. संबंधित विद्यार्थ्यांनी ते पोर्टलवरून डाऊनलोड करून घ्यावे. प्रवेश पत्रावर नमूद केलेली तारीख आणि वेळेनुसारच परीक्षा घेण्यात येणार आहेत. प्रवेशपत्रानुसार परीक्षेला उपस्थित रहावे, याची नोंद घेण्याचे आवाहन विद्यापीठाने केले आहे.