NEET UG 2024 : चुकीच्या उत्तरामुळे परीक्षेचे ४४ विद्यार्थी झाले टॉपर

एज्युवार्ता न्यूज नेटवर्क 

 नीट यूजी (NEET UG 2024) परीक्षेत बसलेल्या उमेदवारांचा मंगळवार दि. ४ जून रोजी निकाल जाहीर करण्यात आला होता. पण या परीक्षेच्या निकाल वादाच्या भोवऱ्यात अडकल्याचं दिसून येत आहे. या परीक्षेत भौतिकशास्त्राच्या प्रश्नाचे एक उत्तर चुकीचे आहे, त्यामुळे विद्यार्थ्यांना ‘ग्रेस मार्क्स’ (GRACE MARKS) देण्यात आले आहेत. परफेक्ट स्कोअर म्हणजे पैकीच्या पैकी गुण (७२०/७२०) मिळवलेल्या ६७ उमेदवारांपैकी तब्बल ४४ विद्यार्थी टॉपर्स झाले होते याचं कारण म्हणजे ते उत्तर त्यांच्या इयत्ता १२ वीच्या NCERT विज्ञानाच्या पुस्तकातील चुकीच्या संदर्भावर आधारित होते.

यामागील वर्षांचा आढावा घेतला तर, २०१९ पासून नीट यूजी (NEET UG) च्या परीक्षेत तीनहून अधिक टॉपर्स आले नव्हते. २०१९ आणि २०२० मध्ये या परीक्षेत केवळ प्रत्येकी एक टॉपर होता. २०२१ मध्ये तीन टॉपर होते, २०२२ मध्येदेखील एक टॉपर होता;  तर २०२३ मध्ये दोन टॉपर्स होते. दरम्यान, आता यावर्षीच्या परीक्षेत आलेल्या चुकीच्या उत्तरामुळे या यादीत तब्बल ४४ जणांचा टॉपर्सच्या यादीत समावेश झाला.  

एनटीएने २९ मे रोजी तात्पुरती उत्तर की (Answer Key) जारी केली होती. ज्यात पर्याय एकचे उत्तर बरोबर असल्याचे दाखवण्यात आले होते. परंतु, दहा हजारांहून अधिक उमेदवारांनी उत्तर की (Answer Key)वर प्रश्न उपस्थित करत ते इयत्ता १२वीच्या NCERT पाठ्यपुस्तकाच्या जुन्या आवृत्तीत चुकीचे असल्याचे म्हटले आहे.

एनटीएच्या अधिकाऱ्यांनी या टॉपर्सबाबत स्पष्टीकरण देताना सांगितले की, आम्ही सर्व उमेदवारांना त्यांच्या नीटच्या तयारीसाठी फक्त NCERT पाठ्यपुस्तकांमधूनच अभ्यास करण्याचा सल्ला दिला होता. त्यामुळे आम्ही त्या सर्व उमेदवारांना श्रेय देण्याचे ठरवले आहे. ज्यांनी उत्तर म्हणून तिसरा पर्याय निवडला आहे. या निर्णयामुळे ४४ उमेदवारांचे गुण ७१५ वरून ७२० झाले. ज्यामुळे ते यावर्षी नीट यूजी-२०२४ च्या टॉपर्सच्या यादीत आहेत.