काकडे महाविद्यालयात मुगुट महोत्सव उत्साहात संपन्न

एज्युवार्ता न्यूज नेटवर्क

बारामती येथील सोमेश्वरनगर (Someshwar Nagar in Baramati) परिसरातील मु .सा. काकडे महाविद्यालयात (Mugutrao Sahebrao Kakade College) जानेवारी महिन्यात मुगुट महोत्सव २०२५ चे (Mugut Festival 2025) आयोजन करण्यात आले. या महोत्सवाचे उद्घाटन बॉलीवूड अभिनेत्री आयली घिया (Bollywood actress Ailee Ghia) यांच्या हस्ते करण्यात आले. यावेळी आयली यांनी जीवनात कलेच्या माध्यमातूनच आनंद मिळतो. त्यामुळे कलेकडे आनंद म्हणून पाहिले पाहिजे, असे मत व्यक्त केले.

 जीवनाला सुंदर बनवण्यासाठी शिक्षण आवश्यक आहे कला, क्रीडा नेतृत्व तसेच अनेक गोष्टी आवश्यक आहे. जीवनामध्ये सुरुवातीला यश मिळेलच असे नाही, परंतु, सातत्याने प्रयत्न केले तर निश्चित यश मिळते. स्वतःच्या चुकांमधून जो शिकतो तोच जीवनात यशस्वी होतो, असे मत प्राचार्य डॉ. नितीन घोरपडे यांनी व्यक्त केले.

 या महोत्सवामध्ये विद्यार्थ्यांसाठी विविध स्पर्धांचे आयोजन करण्यात आले होते. विद्यार्थ्यांच्या कलागुणांना वाव मिळावा म्हणून 'फॅन्सी ड्रेस' चे आयोजन केले होते. यामध्ये हिरकणी, पुष्पा, संविधानची शपथ, छत्रपती शिवाजी महाराज राज्याभिषेक, तसेच महात्मा ज्योतिबा फुले व सावित्रीबाई फुले यांच्या वेशभूषा विद्यार्थ्यांनी परिधान केली होती. या कार्यक्रमाचे आयोजन समन्वयक डॉ. निलेश आढाव यांनी केले.

कार्यक्रमाच्या शेवटी बक्षीस पात्र शिक्षक व विद्यार्थी यांचा सन्मान करण्यात आला. या महोत्सवामध्ये 'काव्य मैफल' याचेही आयोजन करण्यात आले होते.  यावेळी कवी भरत दौंडकर व कवी हनुमंत चांदगुडे यांनी शेतकरी, आई, वडील आणि राजकारण या विषयावर कवितांचे सादरीकरण केले. यावेळी कवी सोमनाथ सुतार, कवी दत्तात्रेय जगताप हेदेखील उपस्थित होते. तसेच 'चांडाळ चौकडीच्या करामती' या वेबसिरीजचे कलावंत मा. रामभाऊ जगताप, मा. भरत शिंदे, मा. सुभाष मदने यांना आमंत्रित करण्यात आले होते यावेळी महाविद्यालयाचे प्राचार्य डॉ. देविदास वायदंडे यांनी या कलावंताची प्रकट मुलाखत घेऊन त्यांच्या कार्यकर्तृत्वाची ओळख सर्व विद्यार्थ्यांना करून दिली.

या मुगुट महोत्सवामध्ये महाविद्यालयाच्या व्यवस्थापन समितीचे अध्यक्ष सतीश काकडे- देशमुख, महाविद्यालय विकास समितीचे अध्यक्ष अभिजीत काकडे- देशमुख, महाविद्यालयाचे सचिव सतीश लकडे, व्यवस्थापन समितीचे सर्व मान्यवर सदस्य यांचे विशेष मार्गदर्शन लाभले. तसेच मुगुट महोत्सव यशस्वी करण्यासाठी महाविद्यालयाचे प्राचार्य डॉ. देविदास वायदंडे यांचे विशेष मार्गदर्शन लाभले. महोत्सव प्रमुख प्रा.हिराचंद काळभोर व विविध समितींचे समन्वयक सदस्य, शिक्षक, शिक्षकेतर कर्मचारी यांचे सहकार्य लाभले. 

सावित्रीबाई फुले पुणे विद्यापीठाचे व्यवस्थापन परिषदेचे सदस्य प्राचार्य डॉ. नितीन घोरपडे, प्रसिद्ध उद्योजक व माजी विद्यार्थी आर.एन.(बापू) शिंदे, प्राचार्य व्यवस्थापन समितीचे सदस्य प्रा. महेंद्रसिंह राजेजाधवराव, प्रा. विलास बोबडे, संकेत जगताप, समन्वयक प्रा.अच्युत शिंदे, सर्व शिक्षक, शिक्षकेतर कर्मचारी व विद्यार्थी उपस्थित होते.