नांदेडमध्ये मेडिकल कॉलेजच्या विद्यार्थिनीची आत्महत्या, कुटुंबाचे वसतिगृह प्रशासनावर गंभीर आरोप

एज्युवार्ता न्यूज नेटवर्क

नांदेड शहरातील एका मेडिकल कॉलेजच्या विद्यार्थिनीची (Nanded city crime news) धक्कादायक घटना उघडकीस आली आहे. हडको परिसरातील शामराव कदम होमिओपॅथिक कॉलेजमध्ये (Shamrao Kadam Homeopathic College) शिक्षण घेणाऱ्या या विद्यार्थिनीने गळफास घेऊन आत्महत्या (Student commits suicide by hanging) केलीय. या घटनेमुळे परिसरात खळबळ उडाली असून मृत विद्यार्थिनीच्या कुटुंबीयांनी वसतिगृह चालकावर गंभीर आरोप (Serious allegations against hostel administration) केले आहेत. हा वसतिगृह चालक एका राजकीय पक्षाशी संबंधित असल्याने या प्रकरणाला आता राजकीय वळण लागले आहे. 

मिळालेल्या प्राथमिक माहितीनुसार, आकांक्षा मुंजाजी गायकवाड (वय 25 वर्षे) असे या मृत विद्यार्थिनीचे नाव आहे. ती वाजेगाव येथील रहिवाशी आहे. या विद्यार्थिनीने हडको भागातील शामराव कदम होमिओपॅथिक कॉलेजशी संबंधित वस्तीगृहात गळफास घेऊन आत्महत्या केली. हा प्रकार उघडकीस आल्यानंतर पोलिसांनी घटनास्थळी धाव घेत पंचनामा केला. त्यानंतर मृतदेह शवविच्छेदनासाठी रुग्णालयात पाठविण्यात आला. दरम्यान, मयत विद्यार्थिनीच्या नातेवाईकांनी वसतिगृह चालकाकडून होत असलेल्या मानसिक त्रासामुळेच आकांक्षाने हे टोकाचे पाऊल उचलल्याचा आरोप केला.

वस्तीगृहाचे चालक जीवन घोगरे पाटील हे राष्ट्रवादी काँग्रेस पक्षाशी संबंधित असल्याचे सांगितले जात आहे. विद्यार्थिनीच्या मोबाईलमध्ये काही ऑडिओ संदेश असल्याचा दावा नातेवाईकांनी केला असून त्यामध्ये अपमानास्पद व अश्लील शब्दांचा वापर केल्याचे सांगण्यात येत आहे. या प्रकरणात संबंधित वसतीगृह चालकाविरोधात गुन्हा दाखल करून सखोल चौकशी करावी, अशी मागणी नातेवाईक व स्थानिकांकडून करण्यात येत आहे. 

दरम्यान, शवविच्छेदनाची प्रक्रिया पूर्ण झाली असली तरी नातेवाईकांनी मृतदेह स्वीकारण्यास नकार दिल्यामुळे पोलिसांसमोर नवीन पेच निर्माण झाला आहे. या घटनेची सखोल चौकशी करून सत्य बाहेर यावे, अशी मागणी नागरिकांकडू व्यक्त केली जात आहे. या प्रकरणी पोलिसांकडून पुढील तपास सुरू आहे.