एमपीएससीने संयुक्त पूर्व परीक्षा २०२४ पुढे ढकलली; विद्यार्थ्यांना आरक्षणाचा लाभ घेता येणार 

एज्युवार्ता न्यूज नेटवर्क 

 महाराष्ट्र लोकसेवा आयोगातर्फे (mpsc ) येत्या २१ जुलै रोजी घेण्यात येणारी महाराष्ट्र राजपत्रित नागरी सेवा संयुक्त पूर्व परीक्षा २०२४ (Joint Prelims Exam 2024)पुढे ढकलण्यात (Postpone)आली असून आता ही परीक्षा २५ ऑगस्ट,२०२४ रोजी घेण्यात येईल, याची सर्व संबंधित उमेदवारांनी नोंद घ्यावी,असे पत्रक एमपीएससीतर्फे प्रसिद्ध करण्यात आले आहे.त्यामुळे अनेक विद्यार्थ्यांना त्यांना अपेक्षित आरक्षणाचा लाभ (Benefit of reservation)घेता येणार आहे. 

महाराष्ट्र लोकसेवा आयोगाकडून प्रसिद्ध करण्यात आलेल्या महाराष्ट्र राजपत्रित नागरी सेवा संयुक्त पूर्व परीक्षा २०२४ परीक्षेकरीता मूळ जाहिरातीस अनुसरून अर्जाद्वारे अराखीव (खुला) (Open) अथवा आर्थिकदृष्ट्या दुर्बल घटकातून (EWS) अर्ज केलेल्या उमेदवारांना सामाजिक व शैक्षणिकदृष्ट्या मागासवर्गाचा (SEBC) अथवा इतर मागास वर्गाचा (OBC) दावा करण्याकरीता विकल्प सादर करण्यासंदर्भात  कार्यवाही करण्याचे आदेश देण्यात आले आहेत.त्यानुसार संबंधित उमेदवार आयोगाच्या ऑनलाईन अर्ज प्रणालीमधील उमेदवारांच्या प्रोफाईल मधील "My Account" सदराखाली परीक्षेच्या जाहिरातीकरीता (जा.क्र ४१४/२०२३) उपलब्ध करून देण्यात आलेल्या Link समोर दर्शविण्यात आलेल्या "Question" या बटनावर क्लिक करून विचारण्यात येणारी माहिती नमूद करून विकल्प सादर करू शकतील.

सामाजिक व शैक्षणिकदृष्ट्या मागासवर्गाचा (SEBC) अथवा इतर मागास वर्गाचा (OBC) दावा करण्याकरीता विकल्प सादर केल्यास संबंधित उमेदवाराचा मूळ अर्जातील दावा रद्द समजण्यात येईल. सामाजिक व शैक्षणिकदृष्ट्या मागासवर्गाचा (SEBC) अथवा इतर मागास वर्गाचा (OBC) विकल्प सादर केलेल्या उमेदवारांना कोणत्याही परिस्थितीत आर्थिक दृष्ट्या दुर्बल घटक (EWS) चा लाभ देण्यात येणार नाही.

सामाजिक व शैक्षणिकदृष्ट्या मागासवर्गाचे (SEBC) अथवा इतर मागास वर्गाचे (OBC) जात प्रमाणपत्र मिळाले आहे, अशा आर्थिकदृष्ट्या दुर्बल घटकातून (EWS) दावा केलेल्या उमेदवारांनी सामाजिक व शैक्षणिकदृष्ट्या मागासवर्ग (SEBC) अथवा इतर मागास वर्गाचा (OBC) विकल्प सादर न केल्यास सदर उमेदवारांचा आर्थिक दृष्ट्या दुर्बल घंटकातील (EWS) दावा ग्राह्य धरण्यात येणार नाही. तसेच सदर दावा बदलण्याची विनंती भरतीप्रकिये दरम्यान कोणत्याही टप्प्यावर मान्य करण्यात येणार नाही.

संबंधित परीक्षेकरीता अर्जाद्वारे अराखीव (खुला) (Open) अथवा आर्थिकदृष्ट्या दुर्बल घटकाचा (EWS) दावा केलेल्या उमेदवाराने सामाजिक व शैक्षणिकदृष्ट्या मागासवर्ग अथवा इतर मागासवर्ग आरक्षणातून लाभ घेण्याकरीता दिनांक १५ जुलै, २०२४ रोजी १४.०० वा. ते दिनांक १४ ऑगस्ट, २०२४ रोजी २३:५९ पर्यंत विकल्प सादर करण्याची कार्यवाही करणे आवश्यक आहे.महाराष्ट्र नागरी सेवा राजपत्रित संयुक्त पूर्व परीक्षा-२०२४ करीता सामाजिक व शैक्षणिकदृष्ट्या मागासवर्ग अथवा इतर
मागासवर्गाचा दावा करण्यासाठी विकल्प सादर करणाऱ्या तसेच नव्याने अर्ज सादर करणाऱ्या उमेदवारांचे जात प्रमाणपत्र सदर विकल्प सादर करण्याच्या अंतिम दिनांकापर्यंत म्हणजेच दिनांक १४ ऑगस्ट, २०२४ पर्यंतचे असणे आवश्यक आहे. या परीक्षेकरीता सामाजिक व शैक्षणिकदृष्ट्या मागासवर्गाचा अथवा इतर मागासवर्गाचा दावा करणाऱ्या उमेदवारांनी सन २०२३-२०२४ अथवा २०२४-२०२५ या आर्थिक वर्षात वैध असणारे उन्नत व प्रगत गटात मोडत नसल्याचे (NCL) प्रमाणपत्र सादर करणे आवश्यक राहील.

दिनांक २९ डिसेंबर, २०२३ रोजी प्रसिद्ध जाहिरात तसेच दिनांक २४ जानेवारी, २०२४, ०८ मे, २०२४ व ३० मे, २०२४ रोजी प्रसिद्ध शुद्धिपत्रकामधील इतर अटी व शर्तीमध्ये कोणताही बदल केलेला नाही,असेही आयोगाने प्रसिध्दी पत्रकात नमूद केले आहे.