रविवारी शेवटची ऑफलाईन सेट परीक्षा; 1 लाख 28 हजार विद्यार्थी देणार परीक्षा
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठातर्फे (Savitribai Phule Pune University) सहायक प्राध्यापक पदाच्या पात्रतेसाठी घेतली जाणारी सेट परीक्षा (set exam) येत्या रविवारी (दि.7) महाराष्ट्र व गोवा राज्यातील (States of Maharashtra and Goa) प्रमुख 17 शहरांमधील 298 परीक्षा केंद्रांवर (exam centers) आयोजित करण्यात आली आहे. यंदा सेट परीक्षेसाठी 1 लाख 28 हजार 243 विद्यार्थ्यांनी नोंदणी केली असून युजीसीच्या (UGC)मार्गदर्शन सूचनानुसार विद्यापीठातर्फे ही शेवटची ऑफलाईन सेट परीक्षा घेतली जाणार आहे. युजीसीच्या निर्देशानुसार विद्यापीठाकडून पुढील सर्व परीक्षा या नेट प्रमाणे ऑनलाईन पध्दतीने आयोजित कराव्या लागणार आहेत.
पुणे विद्यापीठातर्फे आत्तापर्यंत 38 सेट परीक्षा घेण्यात आल्या असून 7 एप्रिल रोजी 39 वी सेट परीक्षा आयोजित केली जात आहे. विद्यापीठातर्फे परीक्षेची सर्व तयारी करण्यात आली असून परीक्षेचे सर्व साहित्य परीक्षा केंद्रांवर पाठवण्यात आले आहेत.विद्यापीठ अनुदान आयोगाच्या निर्देशानुसार विद्यापीठातर्फे ऑफलाईन परीक्षा आयोजित केली जाणार असून 40 वी सेट परीक्षा ही ऑनलाईन असणार आहे. त्यासाठी विद्यापीठाने प्राथमिक तयारी केली आहे.त्यामुळे पुढील सेट परीक्षा ऑनलाईन पध्दतीने घेण्यास अडचण येणार नाही.
सेट परीक्षेचे हॉल तिकीट 28 मार्च पासूनच विद्यार्थ्यांना उपलब्ध करून देण्यात आले आहेत. तसेच परीक्षेबाबत आवश्यक सूचना हॉल तिकिटावर स्पष्ट करण्यात आल्या आहेत. सेट परीक्षेच्या दोन पेपर मध्ये विद्यार्थ्यांना विश्रांती दिली जाणार नाही.तसेच परीक्षेपूर्वी विद्यार्थ्यांनी परीक्षा केंद्रात केव्हा उपस्थित राहावे, याबाबतही स्पष्ट सूचना हॉल तिकिटावर दिल्या आहेत.
---------------------------------
सावित्रीबाई फुले पुणे विद्यापीठातर्फे सेट परीक्षेची सर्व तयारी पूर्ण करण्यात आली आहे. महाराष्ट्र व गोवा राज्यातील 17 शहरांमध्ये 298 परीक्षा केंद्रांवर परीक्षा होणार असून या परीक्षेसाठी 1 लाख 28 हजार 243 विद्यार्थ्यांनी नोंदणी केली आहे.परीक्षेसाठी आवश्यक असणारे सर्व साहित्य परीक्षा केंद्रांवर पाठवण्यात आले आहे.युजीसीच्या मार्गदर्शक सूचनानुसार 7 एप्रिल रोजी शेवटची ऑफलाईन परीक्षा घेतली जात आहे.युजीसीच्या सूचनेनुसार यापुढील काळात ऑनलाईन परीक्षा घेतल्या जातील.
- डॉ. विजय खरे, प्रभारी कुलसचिव , सावित्रीबाई फुले पुणे विद्यापीठ, पुणे
