नकली नोटांचा वापरला फंडा; प्राचार्याला ९ लाखांचा घातला गंडा

एज्युवार्ता न्यूज नेटवर्क 

एका टोळीने नकली नोटांचा (Counterfeit notes) फंडा वापरून प्राचार्याला ९ लाखांचा गंडा (Principal robbed of 9 lakhs) घातल्याचा धक्कादायक प्रकार धाराशिव जिल्ह्यातून समोर आला आहे. फसवणूक झालेले प्राचार्य हे तुळजापूर येथील एका नामांकित संस्थेत प्रभारी प्राचार्य (Principal in charge) म्हणून कार्यरत आहेत. एक कोटी रुपयांचा सीएसआर निधी (CSR fund of 1 crore) संस्थेला मिळवून देतो. मात्र त्यासाठी ९ टक्के म्हणजे ९ लाखांची रोख रक्कम आधी भरावी लागेल, असे सांगण्यात आले. संबंधित प्राचार्याने विश्वास ठेवून ९ लाखांची रक्कम जमा केली. त्यानंतर त्यांना प्राचार्याला १ कोटीचा रोख निधी देण्यात आला. मात्र, त्यामध्ये खेळण्यातील नोटा होत्या. 

संबंधित प्राचार्यांना आपली फसवणूक झाल्याचे लक्षात आल्यानंतर त्यांनी प्रकरणाची सर्व माहिती मुरुड पोलिसांना दिली. त्यानुसार स्टेशन डायरीत या घटनेची नोंद घेतली असून अद्याप एफआयआर दाखल करण्यात आलेला नाही. प्राचार्य हे कर्जबाजारी असल्याचे समजत असून झटपट पैसे मिळवून कर्जमुक्त होण्यासाठी ते अमिषाला भुलले व केलेली उठाठेव त्यांच्या चांगलीच अंगलट आली. आता 'तेरी भी चुप मेरी भी चुप' असे म्हणत गप्प बसायची वेळ त्यांच्यावर आली आहे. 

सीएसआर निधी हा सामाजिक संस्था व इतरांना सामाजिक कामे करण्यासाठी विविध कंपनीच्या मार्फत दिला जातो, हा निधी कधीही रोख स्वरूपात दिला जात नाही, तो संबंधित संस्थेच्या बँक खात्यावर दिला जातो. त्यापूर्वी त्या संस्थेचे कार्य, आर्थिक स्थिती व ज्यासाठी निधी वापरला जाणार आहे तो प्रकल्प अहवाल घेतला जातो. सीएसआर हा कंपन्यांनी समाजकल्याणासाठी खर्च करावयाचा निधी आहे. 

भारतातील कंपन्या अधिनियम, 2013 अंतर्गत कलम 135 नुसार काही विशिष्ट कंपन्यांना (5 कोटी पेक्षा निव्वळ नफा, 500 कोटी पेक्षा अधिक मालमत्ता, 1 हजार कोटी पेक्षा अधिक वार्षिक उलाढाल) त्यांच्या निव्वळ नफ्याचा एक निश्चित टक्का सामाजिक कार्यासाठी खर्च करणे बंधनकारक आहे. पात्र, कंपन्यांनी त्यांच्या मागील तीन आर्थिक वर्षांच्या सरासरी निव्वळ नफ्याच्या किमान 2% सीएसआर उपक्रमांवर खर्च करणे आवश्यक असते. मोठ्या कंपन्याची नावे सांगून फसवणूकीचे प्रमाण वाढले आहे.