FMGE 2024 : उत्तीर्ण उमेदवारांना 20 ऑगस्ट पासून मिळणार प्रमाणपत्र

एज्युवार्ता न्युज नेटवर्क 

फॉरेन मेडिकल ग्रॅज्युएट परीक्षा (FMGE 2024) उत्तीर्ण झालेल्या उमेदवारांसाठी एक महत्त्वपूर्ण अपडेट आहे. नॅशनल बोर्ड ऑफ एक्झामिनेशन इन मेडिकल सायन्सेसने (NBEMS) जाहीर केले आहे की, उमेदवारांचे उत्तीर्ण प्रमाणपत्र (Passing Certificate) 20 ऑगस्ट 2024 पासून वितरित केले जाणार आहेत.यावर्षी FMGE परीक्षा (FMGE Exam) 6 जुलै रोजी नियुक्त परीक्षा केंद्रांवर (Exam Hall) घेण्यात आली होती. 

या परीक्षेत उत्तीर्ण झालेले सर्व उमेदवार 20 ऑगस्टपासून दिल्ली येथील PSP एरिया, सेक्टर-9, द्वारका येथील NBEMS कार्यालयातून त्यांचे उत्तीर्ण प्रमाणपत्र घेऊ शकतील. प्रमाणपत्र मिळविण्यासाठी उमेदवारांना आवश्यक कागदपत्रांसह दिलेल्या पत्त्यावर हजर राहावे लागणार आहे. विद्यार्थ्यांनी नोंद घ्यावी की, प्रमाणपत्र मिळविण्यासाठी त्यांनी “एंट्री स्लिप"ची प्रिंटआउट NBEMS कार्यालयात घेऊन जावे.उत्तीर्ण प्रमाणपत्र मिळविण्याची अंतिम तारीख 21 सप्टेंबर 2024 असणार आहे. 

दरम्यान, जर काही कारणास्तव उमेदवाराला 21 सप्टेंबरच्या निर्धारित वेळेपर्यंत प्रमाणपत्र मिळू शकले नाही, तर त्याला 1 जानेवारी 2025 पर्यंत वेळ देण्यात येईल. या तारखेपर्यंत कोणत्याही उमेदवाराने उत्तीर्ण झाल्याचे प्रमाणपत्र प्राप्त न केल्यास, त्याचा FMGE जून 2024 सत्राचा निकाल रद्द केला जाईल, त्यानंतर तो कोणत्याही प्रकारे तो मिळवू शकणार नाही.