शाळा गुणवत्ता मुल्यांकन व आश्वासन आराखडा भरण्यास मुदतवाढ देण्याची मागणी 

एज्युवार्ता न्यूज नेटवर्क

राज्यातील सर्व शाळांचे मूल्यांकन करण्यासाठी राज्य शैक्षणिक संशोधन व प्रशिक्षण परिषदेने (State Council of Educational Research and Training) पुणे येथे राज्य शाळा मानक प्राधिकरण कक्षाची स्थापना केली आहे.  त्यानुसार राज्यातील सर्व व्यवस्थापनाच्या शाळांनी २८ फेब्रवारीपर्यंत शाळा गुणवत्ता मुल्यांकन व आश्वासन आराखडा (School Quality Assessment and Assurance Plan) भरणे आवश्यक आहे. मात्र, सध्याच्या परिस्थिती या सर्व गोष्टी शक्य नसल्याने त्यासाठी एप्रिलपर्यंत मुदतवाढ देण्याची मागणी महाराष्ट्र राज्य माध्यमिक व उच्च माध्यमिक शाळा मुख्याध्यापक संघाने (Maharashtra State Secondary and Higher Secondary School Mukhyadhyapak Sangh) केली आहे. 

सध्या १० वी व १२ वी च्या बोर्डाच्या परीक्षा सुरू आहेत. त्याचबरोबर सर्व तालुक्यांमध्ये शिक्षक क्षमतावृद्धी प्रशिक्षण सुरू आहे. या व्यतिरिक्त  ५ वी ते ९ वी व ११ वी चा अभ्यासक्रम पूर्ण करणे गरजेचा आहे. तसेच परीक्षेच्या अनुषंगाने विविध कामे पूर्ण करण्याचे काम शाळांमध्ये सुरू आहे. त्यामुळे शाळा गुणवत्ता मूल्यांकन व आश्वासन आराखडा बाबतची महत्त्वपूर्ण माहिती भरण्यास मुदतवाढ मिळावी, अशी मागणी करण्यात आली आहे. 

राज्यातील सर्व माध्यमांच्या व सर्व व्यवस्थापनाच्या शाळांसाठी शाळा गुणवत्ता मूल्यांकन व आश्वासन आराखड्याची (SQAAF) निर्मिती करण्यात आलेली आहे. सर्व माध्यमांच्या व सर्व व्यवस्थापनाच्या शाळांचे स्वयं-मूल्यांकन करण्यासाठी राज्य शैक्षणिक संशोधन व प्रशिक्षण परिषद महाराष्ट्र, पुणे यांच्या maa.ac.in या वेबसाईटवरील SQAAF टॅबवर https://scert-data.web.app/ या नावाने स्वयं-मूल्यांकनासाठीची लिंक उपलब्ध करून देण्यात आली आहे. ही लिंक ही २८ फेब्रुवारी सायंकाळी ५ पर्यंत कार्यान्वित असणार आहे. त्यानंतर ही लिंग बंद करण्यात येणार असल्याची माहिती प्रशिक्षण परिषदेकडून यापुर्वीच देण्यात आली आहे.