मुंबई विद्यापीठ : परीक्षा काही तासांवर तरीही हाॅल तिकीट नाही, विद्यार्थ्यांना नाहक त्रास 

एज्युवार्ता न्यूज नेटवर्क 

मुंबई विद्यापीठाचा (Mumbai University) भोंगळ कारभार पुन्हा एकदा चव्हाट्यावर आला आहे. विद्यापीठाच्या दूरस्थ व ऑनलाइन शिक्षण केंद्राच्या (सीडीओई) परीक्षा (CDOE Exam) काही तासांवर आल्या तरी विद्यार्थ्यांना हाॅल तिकीट उपलब्ध केले गेले नसल्याने नाहक त्रास सहन करावा लागला. विद्यापीठाच्या सीडीओईच्या परीक्षांना सुरु झाल्या आहेत. वेळापत्रकानुसार विद्यापीठाकडून सकाळच्या सत्रात एमए आणि एमकॉम (MA, M.Com, M.Sc. Exams) अभ्यासक्रमाच्या, तर दुपारच्या सत्रात एमएससीच्या पहिल्या सत्राच्या परीक्षांचे आयोजन केले  आहे. या तिन्ही परीक्षांना एकूण ५ हजार ८१ विद्यार्थी बसले आहेत. मात्र, यातील अनेक विद्यार्थ्यांना वेळेत परीक्षेचे हॉल तिकीट मिळाले नसल्याने नाहक त्रास सहन करावा लागला. 

विद्यार्थी हॉल तिकीट मिळविण्यासाठी मागील काही दिवसांपासून प्रयत्न करीत होतो मात्र ते देण्यात आले नाही. काही परीक्षा केंद्रांवर परीक्षा असल्याची सुद्धा माहिती नव्हती. विद्यार्थी परीक्षा केंद्रांवर पोहोचल्यावर काही ठिकाणी परीक्षेची तयारी करण्यात आली. त्यामुळे काही परीक्षा केंद्रावर परीक्षासंबंधीची योग्य माहिती मिळत नसल्याने विद्यार्थ्यांमध्ये गोंधळाचे वातावरण पाहायला मिळाले. 

मुंबई विद्यापीठाने मात्र प्रवेशपत्र उशिरा देण्याचे खापर विद्यार्थ्यांवरच फोडत जबाबदारी झटकली आहे. यंदा प्रवेश प्रक्रियेत सुमारे ६८३ एवढ्या विद्यार्थ्यांनी त्यांचे शैक्षणिक कागदपत्रे जमा केली नव्हती. वारंवार ही कागदपत्रे देण्याची सूचना देऊनही विद्यार्थ्यांनी कागदपत्रे जमा केली नसल्यामुळे त्या विद्यार्थ्यांची पडताळणी होऊ शकली नाही. त्यातून त्यांचे प्रवेशपत्र तयार करण्यात अडचणी आल्या, अशी माहिती विद्यापीठाकडून देण्यात आली आहे. 

______________________________________

विद्यापीठात कारभार सुधारण्यासाठी आम्ही मागील वर्षभरापासून बैठकीची वेळ मागण्यात आहोत. मात्र, त्याकडे दुर्लक्ष करण्यात आले त्यामुळे आजचे हे परिणाम दिसून येत आहेत. भविष्यात तरी विद्यापीठाने यामध्ये सुधारणा करावी अशा सूचना देण्यात आल्या आहे. 

प्रदीप सावंत, सिनेट सदस्य मुंबई विद्यापीठ