गोखले इन्स्टिट्यूटचे कुलगुरू डॉ.अजित रानडेंची नियुक्ती अखेर रद्द

एज्युवार्ता न्यूज नेटवर्क 

पुण्यातील गोखले इन्स्टिट्यूट ऑफ पॉलिटिक्स अँड इकॉनॉमिक्स ((Gokhale Institute of Politics and Economics))या नामांकित अभिमत विद्यापीठाच्या कुलगुरू पदी नियुक्त ( Vice-Chancellor selection)करण्यात आलेल्या डॉ.अजित रानडे यांचे कुलगुरू पद (Vice Chancellor of Gokhale Institute Dr. Ajit Ranade) विद्यापीठाचे कुलपती बिबेक देबरॉय (Chancellor Bibek Debroy)यांनी रद्द केले आहे. युजीसीने निश्चित केलेली शैक्षणिक पात्रता रानडे पूर्ण करत नसल्याने त्यांची नियुक्ती रद्द करावी, अशी मागणी जुलै महिन्यात करण्यात आली होती. या प्रकरणाची चौकशी करण्यासाठी स्थापन करण्यात आलेल्या समितीने दिलेल्या अहवालानुसार डॉ.रानडे यांची नियुक्ती रद्द करण्याचा निर्णय घेण्यात आला आहे.

विद्यापीठ अनुदान आयोगाने स्थापन केलेल्या समितीच्या सदस्यांनी काही महिन्यांपूर्वी अजित रानडे यांची गोखले इन्स्टिट्यूटच्या कुलगुरू पदी नियुक्ती केली होती.मात्र, यूजीसीच्या नियमावलीप्रमाणे आवश्यक शैक्षणिक पात्रता डॉ.रानडे पूर्ण करत नसल्याने त्यांची नियुक्ती रद्द करावी, अशी मागणी मुरली कृष्णा यांनी युजीसीकडे केली होती. गोखले इन्स्टिट्यूटच्या कुलगुरू निवडीसाठी स्थापन करण्यात आलेल्या शोध समितीने तसेच कुलगुरू निवडीसाठी आणि पात्र उमेदवारांची मुलाखत घेण्यासाठी आलेल्या युजीसी प्रतिनिधीने या गोष्टी तपासल्या नाहीत का? असा प्रश्न या निमित्ताने निर्माण होत आहे.

दरम्यान, तक्रार प्राप्त झाल्यानंतर या संदर्भात विद्यापीठाच्या कुलपतींनी फॅक्ट फाइंडिंग कमिटी स्थापन केली होती. विद्यापीठाचे माजी कुलगुरू डॉ.राजीव कुमार यांनी यासंदर्भात चौकशी केली. त्यात युजीसीने निश्चित केलेली पात्रता डॉ.अजित रानडे पूर्ण करत नसल्याचे निष्पन्न झाले. त्यामुळे अजित रानडे यांना बिबेक देबरॉय यांनी कुलगुरू पदावरून हटवले आहे.