प्रभारी कुलसचिव पदाची सूत्रे डॉ.ज्योती भाकरे यांनी स्वीकारली; एज्युवार्ताचे वृत्त ठरले खरे..
पूर्णवेळ कुलसचिव यांची नियुक्ती न करता विद्यापीठाने पुन्हा प्रभारी कुलसचिव नियुक्त केले आहेत. त्यामुळे शिक्षण वर्तुळात उलट सुलट चर्चा सुरू झाल्या आहेत.
eduvarta@gmail.com 
एज्यूवार्ता न्यूज नेटवर्क
सावित्रीबाई फुले पुणे विद्यापीठाच्या (Savitribai Phule Pune University)प्रभारी कुलसचिव (In-charge Registrar)पदाची सूत्रे डॉ.ज्योती भाकरे (Dr Jyoti Bhakare)यांनी सोमवारी दुपारी स्वीकीराली. त्यामुळे विद्यापीठाला पूर्णवेळ कुलसचिव मिळाले नसले तरी विद्यापीठाला पहिल्या प्रभारी कुलसचिव मिळाल्या आहेत. विद्यापीठातील प्रशासनातील अधिकाऱ्यांनी त्यांचे पुष्पगुच्छ देऊन स्वागत केले. या संदर्भातील वृत्त सर्वप्रथम एज्युवार्ताने प्रसिद्ध केले होते. त्यानुसार सोमवारी दुपारी चार वाजता भाकरे यांनी कुलसचिव कार्यालयात येऊन प्रभारी कुलसचिव पदाची सूत्रे हाती घेतली आहेत.
विद्यापीठाला मिळणार पहिल्या प्रभारी महिला कुलसचिव, डॉ.ज्योती भाकरे यांच्याकडे पदभार
सावित्रीबाई फुले पुणे विद्यापीठाच्या कुलसचिव पदावरून गेल्या काही दिवसांपासून वादंग निर्माण झाला. विद्यापीठाने पूर्णवेळ कुलसचिव पदासाठी पात्र उमेदवारांकडून अर्ज मागविले, या उमेदवारांच्या अर्जांची छाननी करून विद्यापीठाने दोन दिवस या उमेदवारांच्या मुलाखती घेतल्या. त्यानंतर पूर्णवेळ कुलसचिव पदासाठी पात्र असलेल्या उमेदवाराची घोषणा करण्यापूर्वी संभाव्य उमेदवारासंदर्भात विविध आरोप प्रत्यारोप करण्यात आले. त्यामुळे पूर्णवेळ कुलसचिव यांची नियुक्ती न करता विद्यापीठाने पुन्हा प्रभारी कुलसचिव नियुक्त केले आहेत. त्यामुळे शिक्षण वर्तुळात उलट सुलट चर्चा सुरू झाल्या आहेत.
विद्यापीठाचे माजी कुलसचिव डॉ.प्रफुल्ल पवार यांचा कार्यकाल संपल्यानंतर विद्यापीठाच्या प्रभारी कुलसचिव पदाची जबाबदारी डॉ.विजय खरे यांच्याकडे देण्यात आली होती. परंतु, पूर्णवेळ कुलसचिव पदाच्या नियुक्ती वरून निर्माण झालेल्या वादंगानंतर डॉ. खरे यांच्याकडे सोपविण्यात आलेला प्रभारी कुलसचिव पदाचा अतिरिक्त कार्यभार आता डॉ. ज्योती भाकरे यांच्याकडे सोपविण्यात आला आहे.
'एज्युवार्ता'शी बोलताना ज्योती भाकरे म्हणाल्या, सावित्रीबाई फुले यांची लेक म्हणुन मी ही जबाबदारी स्वीकारले आहे. क्रांतीज्योती सावित्रीबाई फुले यांची परंपरा पुढे घेऊन जाण्याचा मी प्रामाणिक प्रयत्न करणार आहे. तसेच विद्यापीठाकडून सोपवलेली जबाबदारी पूर्ण क्षमतेने पार पाडणार आहे.
