MPSC : लिपिक-टंकलेखन 2023 निकालाची अपडेट आयोगाकडून जाहीर 

एज्युवार्ता न्यूज नेटवर्क 

लिपिक-टंकलेखक भरतीची (Clerk-Typist Recruitment 2023) जाहिरात प्रसिद्ध होऊन २६ महिने झाले आहेत, तर मुख्य परीक्षा होऊन १४ महिने झाले आहेत. एवढा मोठा कालावधी उलटूनही, महाराष्ट्र लोकसेवा आयोगाने (Maharashtra Public Service Commission) अद्याप तात्पुरती निवड यादी (Still provisional selection list) (पीएसएल) आणि अंतिम निवड यादी प्रकाशित केलेली नाही. त्यामुळे उमेदवारांना आर्थिक आणि मानसिक समस्यांना सामोरे जावे लागत आहे. त्यामुळे आयोगाकडे सर्व स्तरातून विचारणा केली जात होती. त्या पार्श्वभूमीवर आयोगाने लिपिक-टंकलेखन परीक्षा २०२३ निकालाच्या सद्यस्थितिबाबत प्रसिद्धीपत्रक प्रसिद्ध (Press release issued regarding the current situation) केले आहे. याद्वारे निकालाची सध्याची काय अपडेट आहे, हे विद्यार्थ्यांना सांगण्याचा प्रयत्न करण्यात आला आहे. 

महाराष्ट्र गट-क सेवा (मुख्य) परीक्षा-२०२३ मधील 'लिपिक-टंकलेखक' या संवर्गाची सर्वसाधारण गुणवत्ता यादी आयोगाच्या संकेतस्थळावर दिनांक ११ फेब्रुवारी, २०२५ रोजी प्रसिध्द करण्यात आली आहे. सदर गुणवत्ता यादीआधारे दिनांक २१ फेब्रुवारी, २०२५ तसेच ०१ एप्रिल, २०२५ रोजीच्या प्रसिद्धीपत्रकान्वये उमेदवारांकडून नियुक्ती प्राधिकारीनिहाय पसंतीक्रम मागविण्यात आले होते. सदर संवर्गाच्या निकालाबाबत उमेदवारांकडून वारंवार विचारणा करण्यात येत आहे.

त्याला अनुसरुन असे स्पष्ट करण्यात येते की, प्रस्तूत संवर्गाची तात्पुरती निवड यादी प्रसिध्द करण्याची कार्यवाही अंतिम टप्प्यात आहे. विज्ञापित पदांची संख्या, आरक्षण, अर्हता इ. बाबी विचारात घेऊन व पडताळणी करुन प्रस्तुत संवर्गाची तात्पुरती निवड यादी पुढील आठवड्यापर्यंत प्रसिध्द करून उमेदवारांकडून बाहेर पडण्याचा विकल्प (Opt out) मागविण्याची कार्यवाही करण्यात येईल, याची संबंधित उमेदवारांनी कृपया नोंद घ्यावी, असे प्रसिद्ध करण्यात आलेल्या पत्रकात म्हटले आहे.