जात पडताळणीला गती; राज्यातील सर्व समित्यावर अध्यक्षांची नियुक्ती

एज्युवार्ता न्यूज नेटवर्क

काही वर्षांपूर्वी निवडश्रेणी मिळूनही पदोन्नती व पद स्थापनेच्या प्रतीक्षेत असलेल्या राज्यातील ६० अतिरिक्त जिल्हाधिकाऱ्यांना पदोन्नती (Promotion of 60 Additional District Collectors) देऊन त्यांची तातडीने पद स्थापना करण्याचा निर्णय (Decision to appoint) राज्य सरकारने घेतला आहे. यापैकी २९ अधिकाऱ्यांना जिल्हास्तरीय जातपडताळणी समितीचे अध्यक्ष म्हणून पदस्थापना दिल्याची माहिती महसूल मंत्री चंद्रशेखर बावनकुळे (Chandrasekhar Bawankule) यांनी दिली आहे. त्यामुळे राज्यातील सर्व जातपडताळणी समितीवर (Caste Verification Committee) आता अध्यक्ष मिळाले असल्याने विद्यार्थ्यांना याचा फायदा होणार आहे. 

सध्या महाराष्ट्र राज्य परीक्षा कक्षामार्फत विविध अभ्यासक्रमाच्या प्रवेश परीक्षेसाठी अर्ज प्रक्रिया राबवली जात आहे. यामध्ये राखीव वर्गातून अर्ज करणाऱ्या उमेदवारांसाठी जातपडताळणी प्रमाणपत्र बंधनकारण करण्यात आल्यामुळे विविध जिल्ह्यातील जात पडताळणी समितीकडे हजारो अर्ज पडून राहात होते. तसेच विद्यार्थ्यांची गैरसोय होत होती. मात्र, राज्य सरकारने घेतलेल्या या निर्णयामुळे विद्यार्थ्यांना मोठा फायदा होणार असून जात पडताळणी प्रमाणपत्र वेळेत मिळणार आहे. 

महसूल विभागातील सेवाज्येष्ठता यादी जानेवारी २०२५ रोजी प्रसिद्ध करण्यात आली. त्यानंतर लागलीच निवड यादी आणि ६० अधिकाऱ्यांना पदोन्नती देऊन त्यांची नेमणूकही करण्यात आली. जातपडताळणी समिती अधक्षांची ही २९ पदे काही वर्षांपासून रिक्त होती. ती भरल्याने जातपडताळणी समितीकडे निर्णयाविना रखडलेली ओबीसी, व्हीजेएनटी आणि एन.टी. संवर्गातील जातपडताळणीची अनेक प्रकरणे आता तातडीने मार्गी लागतील.