मुंबई विद्यापीठ: पेट आणि एलएलएमचे हॉल तिकीट जाहीर; परीक्षा १७ नोव्हेंबरला

एज्युवार्ता न्यूज नेटवर्क 

मुंबई विद्यापीठातर्फे (Mumbai University) आयोजित पीएच. डी. प्रवेशपूर्व परीक्षा (पेट) (Ph. D. Pre-Entry Examination (PET) ) आणि एलएलएम प्रवेशपूर्व परीक्षेसाठी (LLM Pre-Entrance Examination) विद्यार्थ्यांना त्यांच्या लॉगिन आणि ई-मेल आयडीवर हॉल तिकीट उपलब्ध (Admit card announced) करून देण्यात आले . ही परीक्षा ऑनलाइन सेंटर बेस्ड टेस्ट (सीबीटी) पद्धतीने रविवारी दि. १७ नोव्हेंबर रोजी विविध केंद्रांवर घेतली जाणार आहे.

कोरोनानंतर प्रथमच पेट परीक्षा केंद्रांवर ऑनलाइन पद्धतीने घेतली जात आहे. या परीक्षेसाठी एकूण ४ हजार ९६० विद्यार्थ्यांनी अर्ज केले असून त्यापैकी विज्ञान व तंत्रज्ञान शाखेसाठी सर्वाधिक २ हजार २८५ अर्ज आले आहेत. त्या पाठोपाठ मानव विद्याशाखेसाठी १ हजार ९९, वाणिज्य व व्यवस्थापन विद्याशाखेसाठी ८१३ आणि आंतरविद्याशाखेसाठी ७६३ एवढे अर्ज प्राप्त झाले आहेत. विशेष म्हणजे या परीक्षेत मुलांपेक्षा अधिक मुलींचा सहभाग पाहायला मिळत आहे. एकूण ४ हजार ९६० अर्जांपैकी २ हजार ८०४  विद्यार्थीनी तर २ हजार १५५ विद्यार्थी आणि एका थर्ड जेंडर उमेदवाराचा समावेश आहे. 

एलएलएम प्रवेशपूर्व परीक्षेसाठी ४ हजार ४९६ विद्यार्थ्यांनी अर्ज केले आहेत. ही परीक्षा सकाळी १०:३० ते १२:३० या दोन तासांच्या कालावधीत होईल, तर ‘एलएलएम’ परीक्षा दुपारी ३ ते ४ या एक तासाच्या कालावधीत घेतली जाणार आहे. परीक्षार्थींनी संबंधित परीक्षा केंद्रावर परीक्षेच्या १ तास आधी उपस्थित राहावे, असे आवाहन परीक्षा व मूल्यमापन मंडळाच्या संचालिका डॉ. पूजा रौंदळे यांनी केले आहे.