भारती विद्यापीठाचा २६ वा पदवी प्रदान समारंभ २७ फेब्रुवारीला
पदवी प्रदान समारंभात ६ हजार ८१५ स्रातकांना पदवी प्रदान करण्यात येणार आहे.तसेच ७० विद्यार्थ्यांना पीएच.डी ही पदवी आणि ४२ विद्यार्थ्यांना सुवर्ण पदके प्रदान करण्यात येणार आहेत.
eduvarta@gmail.com 
एज्युवार्ता न्यूज नेटवर्क
भारती विद्यापीठ अभिमत विश्वविद्यालयाचा २६ वा पदवी प्रदान समारंभ येत्या २७ फेब्रुवारी रोजी आयोजित करण्यात आला आहे. लोकसभेचे अध्यक्ष ओम बिर्ला हे या समारंभाचे प्रमुख पाहुणे म्हणून उपस्थित राहून स्रातकांना उद्देशून दीक्षांत भाषण देणार आहेत.विद्यापीठाचे कुलगुरू डॉ. विवेक सावजी यांनी सोमवारी पत्रकार परिषदेत ही माहिती सांगितली.
भारती विद्यापीठ अभिमत विश्वविद्यालयाचे कुलपती डॉ. शिवाजीराव कदम यांच्या अध्यक्षतेखाली होणाऱ्या या समारंभास प्र-कुलगुरू डॉ. विश्वजीत कदम, कुलसचिव जी. जयकुमार, परीक्षा विभागाचे नियंत्रक डॉ. अँथनी रोज उपस्थित राहणार आहेत. या पदवी प्रदान समारंभात ६ हजार ८१५ स्रातकांना पदवी प्रदान करण्यात येणार आहे.तसेच ७० विद्यार्थ्यांना पीएच.डी ही पदवी आणि ४२ विद्यार्थ्यांना सुवर्ण पदके प्रदान करण्यात येणार आहेत. हा कार्यक्रम सकाळी ११.०० वा. भारती विद्यापीठाच्या पुणे-सातारा रोड येथील शैक्षणिक संकुलात संपन्न होणार आहे. असेही डॉ. विवेक सावजी यांनी सांगितले.
डॉ. सावजी म्हणाले, भारती विद्यापीठाच्या स्थापनेच्या वेळीच या विद्यापीठाचे विश्वविद्यालयात रूपांतर करण्याचे स्वप्न डॉ. पतंगराव कदम यांनी पाहिले होते. ते १९९६ साली प्रत्यक्षात उतरले. भारती विद्यापीठाला भारत सरकारने अभिमत विश्वविद्यालयाचा दर्जा दिला.गेल्या २९ वर्षांत भारती विद्यापीठ अभिमत विश्वविद्यालयाने गुणवत्तेच्या बळावर देदीप्यमान कामगिरी करून नामांकित विश्वविद्यालय म्हणून लौकिक मिळवला. केंद्रीय मनुष्यबळ विकास मंत्रालयाने ए-ग्रेड युनिव्र्व्हसिटी म्हणून उमटवलेली मोहर नॅक मूल्यांकनात आणि पुनर्मूल्यांकनात दिलेला ए++ दर्जा, एनआयआरएफमध्ये महाविद्यालयांनी मिळविलेले मानांकन या गोष्ट विश्वविद्यालयाच्या नाव लौकिकात मानाचा तुरा खोवणारा आहे.विद्यापीठात सुमारे 25 हजार विद्यार्थी शिक्षण घेत आहेत.
भारती विद्यापीठाचे विद्यार्थ आज जगभर विविध क्षेत्रात कार्यरत आहेत. त्यांचे बहरलेले कर्तृत्व हीच भारती विद्यापीठाच्या कार्याची खरी पावती आहे. विविध विद्याशाखामध्ये शिक्षण देणारे हे विद्यापीठ आहे. विद्यापीठ यावर्षी जॉईंट डिग्री मास्टर्स प्रोग्राम जर्मनी येथील कोलन विद्यापीठाबरोबर करार करून संयुक्तपणे सुरू केला आहे. एआय इन हेल्थ केअर मध्ये काम करण्यासाठी विद्यापीठाने 5 कोटीचा निधी राखून ठेवला आहे. इस्त्राईल आणि ऑस्ट्रेलिया या देशातील अभ्यासू व्यक्तींना बरोबर घेऊन काम करणार आहे, असेही सावजी म्हणाले.
