BAMU : पदव्युत्तर प्रवेशाचे वेळापत्रक जाहीर, ५ जूनपासून प्रवेश सुरू.. 

एज्युवार्ता न्यूज नेटवर्क 

छत्रपती संभाजीनगर येथील डॉ. बाबासाहेब आंबेडकर मराठवाडा विद्यापीठातील (Dr. Babasaheb Ambedkar Marathwada University) ४५ विभागांमध्ये पदव्युत्तर पदवी अभ्यासक्रम प्रवेशासाठी वेळापत्रक जाहीर (Schedule announced for admission to postgraduate degree courses) करण्यात आले आहे. त्यानुसार ५ जून ते ३० जून या (Registration from June 5th to June 30th) कालावधी विद्यार्थ्यांना ई-समर्थ पोर्टलद्वारे प्रवेशासाठी नोंदणी करता येणार आहे. विशेष म्हणजे यंदा देखील ही प्रवेश प्रक्रिया 'सीईटी' विना पदवीच्या गुणांच्या आधारे राबवली जाणार असल्याची माहिती विद्यापीठ प्रशासनाकडून देण्यात आली आहे.

प्रवेशासाठी विद्यार्थ्यांना संकेतस्थळावर नोंदणी करावी लागेल. ५ ते ३० जून या कालावधीत नोंदणी प्रक्रिया पूर्ण झाल्यानंतर नोंदणीचा डेटा विभागाकडे १ जुलै रोजी सुपूर्द करण्यात येणार आहे. त्यानंतर विद्यार्थ्यांना ५ जुलैपर्यंत संबंधित विभागांत कागदपत्रे सादर करावी लागतील. १४ जुलै रोजी कागदपत्रांची छाननी पूर्ण होईल. १७ जुलै रोजी सामान्य गुणवत्ता यादी जाहीर केली जाईल. आक्षेपासाठी दोन दिवसांची मुदत दिली असून, सुधारित गुणवत्ता यादी २१ जुलै रोजी जाहीर होईल. त्यानंतर २२ जुलै रोजी निवड यादी जाहीर झाल्यानंतर विद्यार्थ्यांना २३ ते २५ जुलै दरम्यान प्रवेश निश्चित करावे लागतील. 

द्वितीय गुणवत्ता यादी २६ जुलै रोजी जाहीर होईल. २८ व ३० जुलै रोजी द्वितीय प्रवेश फेरीसाठी प्रवेश निश्चितीसाठी विद्यार्थ्यांना वेळ दिला आहे. ३१ रोजी विद्यापीठातील विभागात स्पॉट अॅडमिशन होईल. विद्यापीठाच्या एकूण ५१ पैकी विद्यापीठ परिसरात ४३ विभागांत पीजीच्या एकूण ५७ अभ्यासक्रमांसाठी २ हजार २२८ जागा आहेत. त्यासाठी ही प्रवेश प्रक्रिया पार पडणार आहे.