अक्षयतृतीयेची कॉलेजला सुट्टी; विद्यापीठाच्या परीक्षा होणार का? 

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या परीक्षा विभागातर्फे (Examination Department of Savitribai Phule Pune University)विविध अभ्यासक्रमाच्या परीक्षा सुरू असून अहिल्यानगर व नाशिक (Ahilyanagar and Nashik) या दोन जिल्ह्यांमध्ये जिल्हाधिकारी कार्यालयातर्फे 30 एप्रिल रोजी स्थानिक सुट्टी जाहीर करण्यात आली आहे. मात्र, पुणे जिल्ह्यात सुट्टी जाहीर केलेली नाही. त्यामुळे विद्यापीठातर्फे पूर्वनियोजित परीक्षा (pre-planned examination)घेतल्या जाणार किंवा नाही याबाबत विद्यार्थी व महाविद्यालयीन कर्मचाऱ्यांमध्ये संभ्रमाचे वातावरण निर्माण झाले. परंतु, विद्यापीठातर्फे प्रसिद्ध करण्यात आलेल्या वेळापत्रकानुसार तीनही जिल्ह्यांमध्ये 30 एप्रिल रोजी सर्व परीक्षा घेतल्या जाणार आहेत, असे विद्यापीठाच्या परीक्षा व मूल्यमापन मंडळाचे प्रभारी संचालक डॉ.प्रभाकर देसाई (Director-in-charge of Examination and Evaluation Board Dr. Prabhakar Desai)यांनी सांगितले.

पुणे,अहिल्यानगर, नाशिक तीन जिल्ह्यातील पुणे विद्यापीठाशी संलग्न महाविद्यालयात विद्यापीठाच्या परीक्षा विभागातर्फे विविध अभ्यासक्रमाच्या परीक्षांची नियोजन करण्यात आले आहे. या परीक्षांची वेळापत्रक विद्यापीठातर्फे पूर्वीच प्रसिद्ध करण्यात आले आहे. मात्र अहिल्यानगर व नाशिक या दोन जिल्ह्यांमध्ये अक्षय तृतीयेनिमित्त स्थानिक सुट्टी जाहीर करण्यात आली आहे. त्याचप्रमाणे पुणे विद्यापीठातील कर्मचाऱ्यांना सुद्धा पूर्वी केलेल्या कामाची बदली सुट्टी देण्यात आली आहे. मात्र परीक्षा विभाग सुरूच राहणार आहे. अहिल्यानगर व नाशिक या दोन जिल्ह्यांमध्ये स्थानिक सुट्टी असल्याने महाविद्यालयांचे कामकाज बंद राहणार आहे. परंतु, विद्यापीठाच्या परीक्षा या पूर्वनियोजित वेळेनुसारच घेतल्या जाणार आहेत. त्यामुळे विद्यार्थी व परीक्षेचे कामकाज पाहणाऱ्या कर्मचाऱ्यांना महाविद्यालयामध्ये उपस्थित राहावे लागणार आहे. 

विविध स्पर्धा परीक्षांना प्रविष्ट होणारे विद्यार्थी आणि विद्यापीठाच्या परीक्षा यांचा विचार करता. सावित्रीबाई फुले पुणे विद्यापीठाच्या 30 एप्रिल रोजीच्या परीक्षा पुढे ढकलने सद्यस्थितीत शक्य नाही. त्यामुळे विद्यापीठाकडून जाहीर करण्यात आलेल्या सर्व परीक्षा पूर्वनियोजित  वेळापत्रकानुसारच होणार आहेत, याची विद्यार्थ्यांनी नोंद घ्यावी, असे विद्यापीठातर्फे स्पष्ट करण्यात आले आहे.

------------

जिल्हाधिकारी अहिल्यानगर आणि अप्पर आयुक्त नाशिक यांनी आपल्या जिल्ह्यातील महाविद्यालयांना त्यांच्या कक्षेत स्थानिक सुट्टी जाहीर केली आहे. परंतु पुणे जिल्ह्यासाठी अशी सुट्टी जाहीर झालेली नाही. शिवाय परीक्षांचे वेळापत्रक एक महिन्याभरापूर्वी निश्चित झालेले असून स्पेशल परीक्षासुद्धा नजीकच्या काळात घ्याव्या लागणार आहेत. परिणामी स्थानिक सुट्ट्यांमधली विविधता आणि परीक्षेचे नियोजित वेळापत्रक या मर्यादेत राहून दिनांक 30 एप्रिल 2024 रोजीच्या सर्व परीक्षा नियोजित वेळापत्रकाप्रमाणेच होतील.

-डॉ. प्रभाकर देसाई , प्रभारी संचालक, परीक्षा व मूल्यमापन मंडळ, सावित्रीबाई फुले पुणे विद्यापीठ