परकीय भाषा विभागाची प्रवेश प्रक्रिया सुरू;विद्यार्थ्यांना मिळणार क्रेडिट

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या (Savitribai Phule Pune University)परकीय भाषा विभागातर्फे (Foreign Language Department) फ्रेंच,जर्मन, जपानी, रशियन, स्पॅनिश (French, German, Japanese, Russian, Spanish) या परकीय भाषांच्या अभ्यासक्रमाची प्रवेश प्रक्रिया सुरू करण्यात आली आहे. विद्यार्थ्यांना येत्या 31 मे पर्यंत नियमित शुल्कासह अर्ज करता येणार असून 1 जून ते 8 जून या कालावधीत विलंब शुल्कासह अर्ज स्वीकारले जाणार आहेत. प्रवेशाची पहिली गुणवत्ता यादी 14 जून रोजी प्रसिद्ध केलेला आहे.

अभ्यासक्रमाच्या प्रवेश शुल्काचा तपशील विद्यापीठाने परिपत्रकाद्वारे प्रसिद्ध केला असून खुल्या गटासाठी प्रवेश अर्ज शुल्क 800 रुपये तर आरक्षित गटातील विद्यार्थ्यांसाठी 600  रुपये शुल्क आकारले जाणार आहे. विद्यापीठाचे हे अर्धवेळ अभ्यासक्रम ऐच्छिक आहेत. त्यास कोणत्याही प्रकारची शुल्क सवलत लागू असणार नाही.

प्रत्येक भाषेचे अभ्यासक्रमासंबंधीचे स्तर असून या स्तरानुसार विद्यार्थ्यांचे शैक्षणिक अहर्ता निश्चित करण्यात आली आहे. फाउंडेशन कोर्स लेव्हल एक साठी इयत्ता दहावी उत्तीर्ण असणे आवश्यक आहे. त्यापुढील स्तरांसाठीची शैक्षणिक अहर्ता विद्यापीठाने प्रसिद्ध केलेल्या परिपत्रकात नमूद करण्यात आली आहे.
विद्यापीठाच्या परकीय भाषा विभागात ऑनलाइन आणि ऑफलाइन अशा दोन्ही पद्धतीने हे अभ्यासक्रम उपलब्ध असणार आहेत. अभ्यासक्रमानुसार 20 ते 50 विद्यार्थी संख्येपर्यंत विद्यार्थ्यांना प्रवेश दिले जाणार आहेत.
-----------
सावित्रीबाई फुले पुणे विद्यापीठाशी संलग्न कोणत्याही महाविद्यालयात किंवा विद्यापीठाच्या विभागात शिक्षण घेणाऱ्या विद्यार्थ्यांना लेवल एक, दोन, तीन पैकी कोणताही अभ्यासक्रम पूर्ण केल्यास जास्तीचे बारा क्रेडिट मिळतील व लेवल 'चार'चा कोणताही अभ्यासक्रम पूर्ण केल्यास जास्तीचे आठ क्रेडिट मिळतील, असे विद्यापीठाने स्पष्ट केले आहे.