'सीटीईटी'मुळे विद्यापीठाच्या १४ डिसेंबरच्या परीक्षा रद्द
१४ डिसेंबरला होणाऱ्या एम.एसस्सी. तृतीय वर्षांच्या परीक्षा रद्द करण्यात आल्या असून, या परीक्षा २३ डिसेंबरला वेळापत्रकातील वेळेनुसार होणार आहेत.
eduvarta@gmail.com 
एज्युवार्ता न्यूज नेटवर्क
केंद्रीय शिक्षक पात्रता परीक्षा (सीटीईटी) १४ डिसेंबर रोजी आयोजित करण्यात आली असून याच दिवशी राष्ट्रसंत तुकडोजी महाराज नागपूर विद्यापीठाच्या (Rashtrasant Tukadoji Maharaj University, Nagpur) एम.एसस्सी. तृतीय सत्राच्या (M.Sc. Third Semester Examination) जुन्या आणि नव्या अभ्यासक्रमाच्या परीक्षा आहेत. मात्र, यामुळे अनेक विद्यार्थ्यांना 'सीटीईटी' परीक्षा देण्यापासून वंचित राहावे लागणार होते. परंतु, विद्यार्थी हिताचा विचार करून विद्यापीठाच्या परीक्षा विभागाने या दिवशीचा पेपर रद्द करण्याचा निर्णय घेतला आहे.
विद्यार्थ्यांची मागणी लक्षात घेऊन अधिसभा सदस्य दिनेश शेराम यांनी कुलगुरूंना याबाबत निवेदन देत परीक्षेच्या तारखेत बदल करण्याची विनंती केली होती. त्यानुसार आता १४ डिसेंबरला होणाऱ्या एम.एसस्सी. तृतीय वर्षांच्या परीक्षा रद्द करण्यात आल्या आहेत. या परीक्षा २३ डिसेंबरला वेळापत्रकातील वेळेनुसार होणार आहेत.
एम.एसस्सी. करणाऱ्या अनेक विद्यार्थ्यांनी या पूर्वी बी.एड., डी.एड. पदवी घेतलेली असते. त्यामुळे या विद्यार्थ्यांसाठी सीटीईटी परीक्षा महत्त्वाची असते. विद्यार्थ्यांचे होणारे नुकसान लक्षात घेता दिनेश शेराम यांनी कुलगुरूंना निवेदन देत परीक्षेच्या तारखेत बदल करण्याची विनंती केली. यानुसार कुलगुरूंनी १४ डिसेंबरची परीक्षा रद्द करून ती परीक्षा २३ डिसेंबरला होणार आहे. यामुळे अनेक विद्यार्थ्यांना दिलासा मिळाला आहे.
